اسلام آباد دسمبر 20(ٹی این ایس)وفاقی وزیر برائے سمندری امور میر حاصل خان بزنجو نے سینٹ میں آرمی چیف کی بریفنگ کے اقدام کو سراہتے ہوئے کہا ہے کہ ایوان کے ساتھ فوج کی بات چیت سے قومی اہمیت کے معاملات کے حل میں مدد ملے گی۔ایک انٹرویومیں انہوں نے آرمی چیف اور چیئرمین سینٹ رضا ربانی کے اس اقدام کی تعریف کرتے ہوئے کہا کہ ایوان کے ساتھ فوج کی بات چیت سے قومی اہمیت کے معاملات کے حل میں مدد ملے گی۔ انہوں نے کہا کہ آرمی چیف نے سینٹ میں بریفنگ کے دوران تمام اہم مسائل کا احاطہ کیا۔ وفاقی وزیر نے کہا کہ آرمی چیف نے اپنی اس بریفنگ کے دوران خیبرپختونخواہ اور بلوچستان کے مسائل پر بھی تبادلہ خیال کیا۔ انہوں نے کہا کہ پاکستانی افواج ملک میں نظام کا استحکام چاہتی ہیں۔ میر حاصل خان بزنجو نے کہا کہ سینٹ سے حد بندی کے بل کی منظوری بروقت انتخابات کے انعقاد میں مدد دے گی۔ سینٹ کے انتخابات پر تبصرہ کرتے ہوئے انہوں نے کہا کہ سینٹ انتخابات کا انعقاد بھی بروقت ہو گا۔
