اسلام آباد دسمبر 20(ٹی این ایس) وفاقی وزیر داخلہ پروفیسر احسن اقبال نے سی پیک پر کام کرنے والے ورکز کے تحفظ کے لئے بیجنگ اور اسلام آباد پولیس کے درمیان تعاون کو مزید مستحکم بنانے پر اتفاق کرتے ہوئے کہا ہے کہ پاکستان میں چینی ورکرز کا منصوبوں پر کام کرنا ہمارے لئے باعث فخر ہے‘سی پیک کے منصوبوں پر کام کرنے والے چینی ورکرز کو تحفظ فراہم کرنے کےلئے سپیشل سیکورٹی تشکیل دی گئی ہے۔
انہوں نے ان خیالات کا اظہار بدھ کو چین کے سکیورٹی وفد سے ملاقات کے دوران باتیں کرتے ہوئے کیا ۔ملاقات میں پاک چین سکیورٹی تعاون کو مزید فروغ دینے اور سی پیک منصوبوں پر کام کرنے والے ورکرز کوتحفظ دینے سے متعلق امور زیر بحث آئے۔ وزیر داخلہ احسن اقبال نے کہا کہ پچھلے تین برسوں میں پاکستان کی اقتصادی ترقی کے پیچھے سی پیک کا اہم کردار ہے‘سی پیک کے منصوبوں کی تکمیل سے پاکستان اور چین کے تعلقات مزید مضبوط ہوں گے۔
انہوں نے کہا کہ پاکستان میں چینی ورکرز کو مکمل تحفظ فراہم کیا جا رہا ہے‘مغربی سرحد کو محفوظ بنانے کے لئے پاکستان اور چین مل کر کام کریں۔انہوں نے کہا کہ سی پیک سے حاصل ہونے والے اقتصادی فوائد پاکستان اور چین دونوں ممالک کے لیے یکساں ہیں‘پاکستان اور چین مل کر سی پیک کے خلاف سازشوں کو ناکام بنا ئیں گے ۔فریقین نے پبلک سکیورٹی کے شعبے میں دونوں ممالک کے مابین تعاون مزید بڑھانے پر اتفاق کیا ۔
