اسلام آباد جنوری 6(ٹی این ایس): پاک فضائیہ کے سابق سربراہ ائیر مارشل (ر) اصغر خان کی نماز جنازہ راولپنڈی کے نورخان ایئر بیس پر ادا کردی گئی ہے۔ نمازجنازہ میں وزیراعظم شاہد خاقان عباسی، چیئرمین جوائنٹ چیفس آف اسٹاف کمیٹی جنرل زبیر محمود حیات، وفاقی کابینہ کے اراکین، مسلح افواج کے سربراہان اور دیگر اعلیٰ عسکری و سیاسی حکام نے شرکت کی۔ اصغرخان مرحوم کی میت کو پاکستانی پرچم میں لپیٹا گیا اور پاک فضائیہ کے چاق و چوبند دستے نے انہیں سلامی دی۔نمازجنازہ کے بعد ان کی میت کوایبٹ آباد روانہ کردیا گیا ہے جہاں اڑھائی بجے ایبٹ آباد کے فرنٹئیر فورس رجمنٹل سینٹرگراﺅنڈ میں ان کی نمازجنازہ دوبارہ ادا کی جائے گی انہیں نواں شہر میں ان کے آبائی قبرستان میں سپرد خاک کیا جائے گا۔
