کوئٹہ،جنوری 15 (ٹی این ایس):وزیر اعلیٰ بلوچستان میر عبدالقدوس بزنجونے ضلع تربت کے علاقے شپک میں دہشت گردوں کے حملے کے نتیجے میں سیکورٹی فورسز کی گاڑی الٹنے سے سیکورٹی اہلکاروں کی شہادت اور زخمی ہونے پر دلی رنج و غم کا اظہار کرتے ہوئے دہشت گردی کے اس بزدلانہ واقعہ کی مذمت کی ہے۔
اپنے ایک تعزیتی بیان میں وزیر اعلیٰ نے واقعہ کے شہداء کے خاندانوں سے تعزیت اور ہمدردی کا اظہار کرتے ہوئے کہا ہے کہ بزدل دہشت گرد چھپ کر سیکورٹی فورسز کو نشانہ بنارہے ہیں تاکہ بدامنی پیدا کر کے ترقیاتی عمل کو روکا جاسکے تاہم انہوں نے اس عزم کا اظہار کیا ہے کہ ملک دشمن عناصر کے ناپاک عزائم کو سیکورٹی فورسز کی کاؤشوں و قربانیوں اور عوام کی تائید و حمایت سے ناکام بنادیا جائیگا اور شہداء کی قربانیاں رائیگاں نہیں جائیں گی۔ وزیراعلیٰ نے کہا ہے کہ دہشت گردی کی جنگ میں جانوں کے نظرانے پیش کرنے والے ہمارے ہیرو ہیں اور بلوچستان کے عوام ان قربانیوں کو انتہائی قدر کی نگاہ سے دیکھتے ہیں۔ وزیر اعلیٰ نے دعا کی ہے کہ اللہ تعالیٰ شہداء کے درجات بلند کرے اور زخمیوں کو جلد صحت یابی عطا کرے۔
