اسلام آباد فروری 20(ٹی این ایس)قومی احتساب بیورو کی ہدایت پر نیب خیبر پختونخوا نے تحریک انصاف کے سربراہ عمران خان کی طرف سے دو سرکاری ہیلی کاپٹروں کے مبینہ غیر قانونی استعمال کی تحقیقات کیلئے ٹیم تشکیل دیدی ہے ۔ڈائریکٹر نیب خیبر پختونخوا کی سربراہی میں قائم ٹیم عمران خان کے سرکاری ہیلی کاپٹروں میں دوروں کی چھان بین کرے گی۔میڈیار پورٹ کے مطابق تحریک انصاف کے سربراہ عمران خان پر خیبرپختونخوا کے دو ہیلی کاپٹروں پر 74 گھنٹے غیر قانونی طور پرسفر کرنے کے الزامات ہیں۔چیئرمین نیب جسٹس(ر) جاوید اقبال نے 2فروری کوہیلی کاپٹر سکینڈل کا نوٹس لیا تھا ٗنیب خیبر پختونخوا نے ہیڈ کوارٹر سے موصولہ مراسلے کی بنیاد پر الزامات کی تحقیقات کے لئے مشترکہ ٹیم تشکیل دی ہے ۔تحقیقاتی ٹیم کی سربراہی ڈائریکٹر نیب خیبرپختونخوا نوید حیدر کرینگے۔ٹیم میں قانونی ماہرین اور تحقیقاتی افسران بھی شامل ہیں۔ذرائع کے مطابق عمران خان پر ایم آئی 171ہیلی کاپٹر پر 22 گھنٹے جبکہ ایکیوریل ہیلی کاپٹر پر 52گھنٹے سفر کے بدلے صرف 21 لاکھ روپے ادا کرنے کا الزام ہے۔ذرائع کے مطابق عمران خان پر ایم آئی 171ہیلی کاپٹر پر بنی گالا سے کوہاٹ، پشاور،مردان،بٹگرام ،دیر اور کمراٹ جبکہ ایکیوریل ہیلی پر بنی گالا سے پشاور ٗکوہاٹ ٗایبٹ آبا ٗ،ہری پور،چترال،سوات اورنوشہرہ تک کا سفر کرنے کے الزامات ہیں ۔
