ریاض اپریل 14(ٹی این ایس)سعودی وزیر خارجہ عادل الجْبیر نے کہا ہے کہ عرب لیگ کے سربراہی اجلاس کے ایجنڈے میں قطر کے تنازعے کو شامل نہیں کیا گیا ہے۔غیرملکی خبررساں ادارے کے مطابق سعودی وزیر خارجہ نے یہ بات عرب لیگ کی سمٹ سے دو روز قبل ریاض میں صحافیوں سے بات کرتے ہوئے کہی۔ بائیس عرب ریاستوں کے اس سربراہی اجلاس کی میزبانی سعودی عرب کر رہا ہے۔ الجْبیر کا کہنا تھا کہ قطر کا تنازعہ خلیجی کونسل حل کرے گی۔ یاد رہے کہ سعودی عرب اور اس کے اتحادی ممالک نے قطر پر دہشت گردی کی حمایت کا الزام عائد کرتے ہوئے اس سے سفارتی تعلقات منقطع کر دیے تھے۔ تاہم قطر ان الزامات کی تردید کرتا ہے۔
