کراچی مئی 9(ٹی این ایس)محکمہ موسمیات نے اگلے ایک ہفتے تک گرمی میں توازن برقرار رہنے کی پیش گوئی کردی۔محکمہ موسمیات کے ریجنل ڈائریکٹر شاہد عباس نے بتایا کہ اگلے ایک ہفتے تک درجہ حرارت معتدل رہنے کی توقع ہے ٗرواں ماہ 13مئی تک شہر کے درجہ حرارت میں کوئی غیر معمولی اضافے کا امکان نہیں ہے۔ انہوں نے کہاکہ مئی میں عموماً شہر کا موسم گرم رہتا ہے ٗاس وجہ سے یہ امکان بھی موجود ہے کہ اس ماہ کے وسط یا پھر آخر میں درجہ حرارت میں اضافہ ہوسکتا ہے۔شہر کا کم سے کم درجہ حرارت 27.5جبکہ زیادہ سے زیادہ 35.6ڈگری ریکارڈ ہوا، سمندر کی سمت سے چلنے والی ہواؤں کی رفتار 40کلومیٹر فی گھنٹہ ریکارڈ کی گئی، تیز ہواؤں کی وجہ سے نمی کے تناسب میں بھی اضافہ دیکھنے میں آیا ٗ صبح کے وقت نمی کاتناسب 76 ٗدن بھر 50فیصد رہا، اگلے 24 گھنٹوں کے دوران موسم خشک رہے گا ٗ ہلکی حدت برقرار رہنے کا امکان ہے۔
