کراچی، جون 11 (ٹی این ایس): جامعہ کراچی کے وائس چانسلر پروفیسر ڈاکٹر محمد اجمل خان نے جامعہ کراچی کے اساتذہ کے لیے عید الاؤنس کی منظوری دیتے ہوئے کہا کہ
کوشش ہے اساتذہ اور ملازمین کو زیادہ سے زیادہ سہولیات فراہم کی جائیں، نامساعد مالی حالات کے باوجود جامعہ کراچی کے اساتذہ تدریس وتحقیق میں ہمہ وقت مصروف رہتے ہیں،اگرانہیں تحقیق کے لیے ان کی ضروریات کے مطابق وسائل فراہم کیے جائیں تو یہ اساتذہ اپنی تحقیق کے ذریعے نہ صرف معاشرتی مسائل کے حل بلکہ ملک کی ترقی کے لیے بھی اپنا کلیدی اور مثبت کردار اداکرسکتے ہیں۔کوئی بھی مہذب وترقی پسند قوم ، ملک ،معاشرہ استاد کے مقام ومرتبہ اور اہمیت سے انحراف نہیں کرسکتا،کوئی بھی معاشرہ تعلیم کے بغیر ترقی نہیں کرسکتا اور تعلیم کا حصول استاد کے بغیر ممکن نہیں،اساتذہ ہی سوسائٹی کو محقق، سائنسدان، سیاستدان اور متعدد شعبہ ہائے حیات سے تعلق رکھنے والے ماہرین فراہم کرنے میں کلیدی کردار اداکرتے ہیں۔جامعہ کراچی کے نامساعد مالی حالات کے باوجود بھی میری پوری کوشش ہوتی ہے کہ جامعہ کراچی کے اساتذہ اور ملازمین کو زیادہ سے زیادہ سہولیات فراہم کی جائیں اور ان کے تمام واجبات کو بروقت یقینی بنایا جائے۔واضح رہے کہ اساتذہ کے عید الاؤنس کی رقم جلد ہی ان کے اکاؤنٹ میں منتقل کردی جائے گی۔
