اسلام آباد، جون 14 (ٹی این ایس): نگراں حکومت نے ملک بھر میں شفاف اور غیرجانبدار انتخابات کے انعقاد کو یقینی بنانے کے لیے چاروں صوبوں کے آئی جی پولیس اور چیف سیکریٹریز کا تبادلہ کردیا۔
وزیراعظم ہاؤس اسلام آباد میں نگراں وزیراعظم جسٹس (ر) ناصرالملک کی زیرصدارت وفاقی کابینہ کا اجلاس ہوا جس میں اہم انتظامی فیصلے کیے گئے۔کابینہ نے الیکشن کمیشن آف پاکستان اور متعلقہ حکومتوں سے مشاورت کے ساتھ ملک میں شفاف اور غیرجانبدار انتخابات کو یقینی بنانے کے لیے آئی جیز اور چیف سیکریٹریز کے تبادلوں کی منظوری دے دی۔
وفاقی حکومت کی جانب سے جاری کردہ نوٹی فکیشن کے مطابق اکبرحسین درانی کو چیف سیکریٹری پنجاب، اعظم سلیمان خان کو سندھ، نوید کامران بلوچ کو خیبرپختونخوا (کے پی) اور اختر نذیر کو بلوچستان کا چیف سیکریٹری تعینات کردیا گیا۔
تمام صوبوں کے آئی جی پولیس کے بھی تبادلے کردیے گئے، نئی تعیناتیوں کے مطابق ڈاکٹر کلیم امام کو پنجاب، امجد جاوید سلیمی کو سندھ، محمد طاہر کو کے پی اور محسن حسن بٹ کو بلوچستان کا نیا آئی جی تعینات کردیا گیا ہے۔
وفاقی حکومت نے سابق آئی جیز اور چیف سیکریٹریز کو تبادلے کا نوٹی فکیشن جاری کرتے ہوئے کابینہ ڈویژن میں رپورٹ کرنے کی ہدایت کی ہے۔
نئے آئی جی سندھ امجد جاوید سلیمی نے یکم نومبر 1986 کو سول سروس جوائن کی اور ان کا تعلق پولیس سروس کے 14 ویں کامن سے ہے۔
ان کا ڈومیسائل پنجاب کے شہر فیصل آباد سے ہےاور وہ31 جنوری 2020 کو ریٹائر ہوں گے۔
نئے آئی جی پنجاب کلیم امام نے یکم نومبر 1988 کو سول سروس جوائن کی اور ان کا تعلق پولیس سروس کے 16 ویں کامن سے ہے اور ان کا ڈومیسائل سندھ اربن سے ہے۔اور وہ 24 اپریل 2022 کو ریٹائر ہوں گے۔
نئے آئی جی کے پی محمد طاہر نے یکم نومبر 1988 کو سول سروس جوائن کی اور ان کا تعلق پولیس سروس کے 16 ویں کامن سے ہے۔انکی ریٹائرمنٹ کی تاریخ 21 نومبر 2020ہے۔
نئے آئی جی بلوچستان محمد حسن بٹ نے 18 نومبر 1989 کو سول سروس جوائن کی۔محمد حسن بٹ کا تعلق پولیس سروس کے 17 ویں کامن اور ڈومیسائل راولپنڈی کا ہے۔
نئے چیف سیکرٹری سندھ میجر ریٹائرڈ اعظم سلیمان خان نے 3 اگست 1991 کو سول سروس جوائن کی۔لاہور سے تعلق رکھنے والے گریڈ 22 کے اعظم سلیمان کا تعلق پاکستان ایڈمنسٹریٹو سروس سے ہے۔اعظم سلیمان خان 22 مارچ 2021 کو سول سروس سے ریٹائر ہوں گے۔
نئے چیف سیکرٹری پنجاب اکبر حسین درانی نے یکم نومبر 1988 کو سول سروس جوائن کی۔کیپٹن ریٹائرڈ اکبر حسین درانی کا تعلق 16 ویں کامن اور ڈومیسائل کوئٹہ سے ہے۔
