سندھ ہائیکورٹ نے راؤ انوار کو سب جیل میں رکھنے سے متعلق درخواست پر سماعت 29 جون تک ملتوی کردی
سندھ حکومت راؤانوار کی مدد کررہی ہے، ہمیں مجبور نہ کریں کہ ہم انصاف کی آخری حد تک جائیں گے ٗلواحقین نقیب اللہ
کراچی جون25(ٹی این ایس) لیس کے ہاتھوں جعلی مقابلے میں ہلاک کیے جانے والے نقیب اللہ کے اہل خانہ نے کیس میں ملوث ملزم شعیب شوٹر سمیت دیگر کی گرفتاری کیلئے سندھ ہائیکورٹ کے باہر مظاہرہ کیا۔ پیر کو سندھ ہائیکورٹ میں نقیب قتل کیس کے ملزم راؤانوار کو سب جیل میں رکھنے کی درخواست کی سماعت ہوئی ، درخواست گزار کے وکیل فیصل صدیقی ایڈووکیٹ نے اپنے دلائل میں کہا کہ راؤ انوار اپنے گھر میں موجود ہےٗ پھر بھی انہیں مزید سہولیات چاہئیں، ملزم کے گھر کو سب جیل قراردیا گیا جو غیر قانونی ہے۔درخواست گزار کے وکیل کے مطابق ملزم راؤ انوار کیس کے گواہوں کو ہراساں کر رہا ہے۔عدالت نے فریقین کے دلائل سننے کے بعد مزید کارروائی کے لیے درخواست کی سماعت 29 جون تک ملتوی کردی۔دوسری جانب سماعت سے قبل نقیب کے اہلخانہ اور جرگہ عمائدین نے سندھ ہائیکورٹ کے باہر مظاہرہ کیا اور راؤ انوار کے خلاف نعرے لگائے، مظاہرین نے قتل میں ملوث ملزم شعیب شوٹر و دیگر کو فوری گرفتار کرنے کا مطالبہ کیا۔سندھ ہائی کورٹ میں نقیب اللہ محسود کے لواحقین نے میڈیا سے گفتگو کرتے ہوئے کہا کہ سندھ حکومت راؤانوار کی مدد کررہی ہے، کیا وجہ ہے کہ ملزم کی طرف داری کی جارہی ہے، ہمیں مجبور نہ کریں کہ ہم انصاف کی آخری حد تک جائیں گے۔
