کراچی جولائی 4 (ٹی این ایس )پاکستان عوامی تحریک کے مرکزی صدر قاضی زاہد حسین اور سیکرٹری جنرل خرم نواز گنڈاپور،صوبائی صدر مشتاق صدیقی،جنرل سیکرٹری راؤ کامران محمود نے مشترکہ بیان میں کہا ہے کہ ساری زندگی سرکاری محکموں میں ایمانداری کے ساتھ ریاست کی خدمت کرنے والے اورپاکستان کیلئے ہجرت کرنے والے ریٹائرڈ اور مرحومین کی بیوگان اور ان کے بچوں سے کراچی میں وفاقی وزارت ہاؤسنگ اینڈ ورکس کے سرکاری کوارٹررز اور فلیٹس خالی کروانے کے حوالے سے ناانصافی پر مبنی اقدامات کاچیف جسٹس سپریم کورٹ فوری نوٹس لیں ورنہ ہزاروں خاندانوں کو محکمہ کے کرپٹ افسران اور اہلکار سڑک پر لا بٹھائیں گے، 70سال سے ان کوارٹروں میں مقیم بزرگ شہریوں، بیوگان کو قابضین قرار دے کر ان کی تذلیل نہ کی جائے اور نہ ہی انہیں متعلقہ سٹیٹ ڈیپارٹمنٹ کے کرپٹ افسران اور اہلکاروں کے رحم و کرم پر چھوڑا جائے۔ پاکستان عوامی تحریک کی سینئر مرکزی قیادت نے کہا کہ وفاقی حکومت کی زمینوں پر تعمیر ان فلیٹس کے بارے میں محکمہ کے کرپٹ افسروں نے عدالت عظمیٰ کو غلط معلومات فراہم کیں اور عدالتی ججمنٹ کو پیسہ بنانے کیلئے استعمال کررہے ہیں۔ پاکستان عوامی تحریک چیف جسٹس سپریم کورٹ سے اپیل کرتی ہے کہ کراچی میں وفاقی حکومت کی ملکیتی زمینوں پر قائم فلیٹس خالی کروانے کا معاملہ بحران کی شکل اختیار کررہا ہے اسے انسانی المیہ بننے سے پیشتر حل کیا جائے اور اس ضمن میں ہمدردانہ اور منصفانہ لائحہ عمل طے کیا جائے ، ناانصافی کا شکار مستحقین اور ناجائز قابضین میں فرق کیا جائے، انہوں نے کہا کہ 70سال سے خدمات پیش کرنے والے ریٹائرڈ مکینوں, بیوگان اور غریب ورثاء سے چھت چھیننا ظلم عظیم ہے، انہوں نے کہا کہ ہماری متاثرین سے بات چیت ہوئی ہے اور ہمارے سینئر عہدیدار بھی متاثرہ خاندانوں کے رابطے میں ہیں، ان کا موقف ہے کہ سرکاری افسران سپریم کورٹ کی ججمنٹ کو اپنے مذموم مقاصد کیلئے استعمال کررہے ہیں اورانسان دوست ہمدرد شخصیت چیف جسٹس کے بارے میں غلط فہمی پیدا کررہے ہیں، بیوروکریٹس نے چالاکی اور عیاری کے ساتھ ناجائز قابضین کے حوالے سے چیف جسٹس کو غلط معلومات فراہم کیں، اور اب اس کی آڑ میں دیہاڑیاں لگارہے ہیں، ہماری چیف جسٹس سے استدعا ہے کہ وہ متاثرین کو حالات کے رحم و کرم پر نہ چھوڑیں اور فوری طور پر معاملہ کا ازسرنو نوٹس لیں، انہوں نے کہا کہ پاکستان عوامی تحریک کراچی کی تنظیم متاثرین کے ساتھ کھڑی ہیں اور اس ظلم کے خلاف سراپا احتجاج ہیں، ہماری چیف جسٹس سپریم کورٹ سے درخواست ہے کہ وہ اس کا فوری نوٹس لیں۔
