کسی دباؤ کو خاطر میں نہ لائیں، میری طرف سے آپ کو مکمل تحفظ حاصل ہے : کوئٹہ میں نیب افسران  سے چیئرمین نیب کا خطاب

کوئٹہ،جولائی 11 (ٹی این ایس): چیئرمین نیب جسٹس (ریٹائرڈ) جاوید اقبال نے کہا ہے کہ انھوں نے کبھی میرٹ پر سمجھوتا کیا ہے اور نہ کریں گے ۔

کوئٹہ میں نیب ہیڈکوارٹر میں افسران سےخطاب  کے دوران ان کا کہنا تھا کہ آپ کسی دباؤ کو خاطر میں نہ لائیں، میری طرف سے آپ کو مکمل تحفظ حاصل ہے، نیب کرپشن کے خاتمے کا فریضہ قومی ذمہ داری اور اعزاز سمجھ کر ادا کررہا ہے اور بدعنوانی کے اندھیرے دور کرنے کیلئے سب کو اپنےحصے کا چراغ روشن کرنا ہوگا۔

انھوں نے کہا کہ بدعنوانی کا مرتکب شخص ملک وقوم کا مجرم ہے، ہر کرپٹ شخص کو اس کے برے فعل و عمل کا جوابدہ بنایا جارہا ہے ، بلوچستان میں کرپشن کے کئی بند کیسز میں قانونی شواہد موجود ہیں جن کو میرٹ اور قانون کے مطابق دوبارہ کھولا جائے گا

چئیرمین نیب  نے کہا  کہ کرپشن کی وجہ سے پاکستان 90 ارب ڈالر کا مقروض ہوچکا ہے، ہماری پانچ نسلوں کو قرض کے وبال کو بھگتنا ہے، ہر پاکستانی ایک لاکھ 70 ہزار روپے کا مقروض ہے۔