مقامی رہنما اسلم بھٹی کے گن مین نے کھلے عام اسلحے کی نمائش کرتے ہوئے ہوائی فائرنگ کی
لاہور جولائی 11(ٹی این ایس): صوبہ پنجاب کے دارالحکومت لاہور کے علاقے کوٹ لکھپت میں مسلم لیگ (ن) کی کارنر میٹنگ کے دوران ہوائی فائرنگ سے 9 سالہ بچہ ہلاک جبکہ ایک 12 سالہ بچہ زخمی ہوگیا۔زرائع کے مطابق لاہور کے صوبائی حلقے پی پی 168 سے مسلم لیگ (ن) کے امیدوار خواجہ سعد رفیق کی انتخابی مہم کے سلسلے میں کارنر میٹنگ کا اہتمام کیا گیا تھا۔خواجہ سعد رفیق کی آمد سے پہلے ہی ایک مقامی رہنما اسلم بھٹی کے گن مین نے کھلے عام اسلحے کی نمائش کرتے ہوئے ہوائی فائرنگ کردی۔ایس ایس پی انویسٹی گیشن اویس ملک کے مطابق ایک گن مین کے ہاتھ سے بندوق پھسلی اور گولیاں سیدھی چلنے لگیں، جس کی زد میں دو کمسن بچے آگئے۔فائرنگ کے نتیجے میں 9 سالہ مظہر جاں بحق جبکہ 12 سالہ فہد منظور زخمی ہوگیا۔اس موقع پر بھگدڑ مچ گئی، جس کا فائدہ اٹھاتے ہوئے گن مین فرار ہوگیا۔بعدازاں پولیس نے چھاپہ مارکر مرکزی ملزم رمضان عرف بلا کو دو ساتھیوں شبیر اور بلال سمیت گرفتار کرکے اسلحہ برآمد کرلیا۔
