پولیس کی جانب سے آنسو گیس کے شیلز کی فائرنگ، کچھ مشتعل ن لیگی کارکن علامہ اقبال ائیرپورٹ کی حدود میں داخل ہونے میں کامیاب ہوگئے
لاہور جولائی 13(ٹی این ایس) لاہور ائیرپورٹ کے قریب ن لیگ کے مشتعل کارکنوں اور پولیس کے درمیان شدید جھڑپیں، پولیس کی جانب سے آنسو گیس کے شیلز کی فائرنگ،، کچھ مشتعل ن لیگی کارکن علامہ اقبال ائیرپورٹ کی حدود میں داخل ہونے میں کامیاب ہوگئے۔ تفصیلات کے مطابق لاہور ائیرپورٹ کے قریب امن و امان کی صورتحال بگڑ گئی ہے۔ لاہور ائیرپورٹ کے قریب ن لیگ کے مشتعل کارکنوں اور پولیس کے درمیان شدید جھڑپیں ہوئی ہیں۔
پولیس کی جانب سے مشتعل کارکنوں پر آنسو گیس کے شیلز کی فائرنگ کی گئی ہے جس کے باعث کئی افراد زخمی ہوئے ہیں۔ جبکہ کچھ مشتعل ن لیگی کارکن علامہ اقبال ائیرپورٹ کی حدود میں داخل ہونے میں بھی کامیاب ہوگئے ہیں۔ دوسری جانب صدر ن لیگ شہبازشریف نے انتظامیہ کوخبردار کیا ہے کہ اگر نوازشریف کے طیارے کارخ اسلام آباد کی جانب موڑا گیا تون لیگی کارکنان یہاں سے اسلام آباد کی جانب مارچ کریں گے۔
انہوں نے اس سے قبل میڈیا سے گفتگو کرتے ہوئے کہا تھا کہ راستہ روکا گیا توہمیں کوئی کنٹرول نہیں کرسکے گا۔جس راستے سے اللہ لے جائے گا چلے جائیں گے۔انہوں نے کہاکہ ہمارا راستہ کوئی نہیں روک سکتا۔ ہرصورت ایئرپورٹ پہنچیں گے۔ خیال رہے احتساب عدالت میں ایون فیلڈ ریفرنس میں سزا یافتہ مسلم لیگ ن کے قائد نوازشریف اورا ن کی صاحبزادی نیب کوگرفتاری دینے کیلئے آج لندن سے لاہور واپس آرہے ہیں۔
نوازشریف کے استقبال کیلئے ن لیگی کارکنان کے قافلے پنجاب بھر سے لاہور کی جانب رواں دواں ہیں۔اطلاعات ہیں کہ متعدد مقامات پرکارکنان کوروک لیا گیا ہے ۔گزشتہ کچھ دنوں سے کارکنوں کی پکڑ دھکڑ کا سلسلہ بھی جاری ہے۔۔ن لیگ کے سینکڑوں عہدیدران اور کارکنان کوگرفتار کرلیا گیا ہے۔۔لاہور کے داخلی و خارجی راستوں کوکنٹینرزلگا کربند کردیا گیا ہے۔
تاہم اس کے باوجود ن لیگی کارکنان نوازشریف کے استقبال کرنے کا عزم لیے ہوئے ہیں۔مسلم لیگ ن کا قافلہ پارٹی صدرشہبازشریف کی قیادت میں لاہور ایئرپورٹ کی جانب رواں دواں ہے۔کارکن کاروں، موٹرسائیکلوں اور بسوں پرسوار ہیں۔ن لیگی کارکنان شیر شیر کے نعرے لگا رہے ہیں۔دوسری جانب راوی پل پرپولیس اور ن لیگی کارکنان میں تصادم ہوگیا۔۔پولیس نے کارکنان کوروکنے کیلئے آنسو گیس کی شیلنگ کی اور لاٹھی چارج بھی کیا۔
جبکہ اس کے ردعمل میں لیگی کارکنان نے بھی پولیس پرپتھراؤکیا۔مزید برآں آئی جی پنجاب کلیم امام نے تمام سیاسی کارکنان کورہا کرنے کاحکم دے دیا ہے۔آئی جی پولیس کے حکم کے ساتھ ہی سیاسی کارکنان کی رہائی کاعمل شروع کردیا گیا ہے۔اسی طرح نگراں وزیرداخلہ پنجاب شوکت جاوید نے پریس کانفرنس کرتے ہوئے کہا کہ نگراں حکومت غیرجانبدار ہے کسی سیاسی جماعت سے تعلق نہیں ہے۔
ن لیگ کی قیادت کونظربند کیا نہ ہی ایسا کوئی پلان ہے۔انہوں نے کہا کہ مسلم لیگ ن نے ریلی کیلئے اجازت نہیں لی۔ ریلی روکنے کیلئے وہی اقدامات کیے جوحکومتیں کرتی ہیں۔کوئی بھی حکومت ہووہ ایسے ہی انتظامات کرتی ہے۔۔وزیرداخلہ پنجاب نے کہا کہ کسی بھی ریلی کوایئرپورٹ کی جانب جانے کی اجازت نہیں ہے۔ایئرپورٹ ایریاوفاقی اداروں کے کنٹرول میں ہے۔۔لاہور ایئرپورٹ پرباڑ لگی ہے اس کوکراس نہ کیا جائے۔ہم یقین دلاتے ہیں ہم بالکل غیرجانبدار ہیں۔
