لاریب نے اپنا کیریئر 2006 میں 19 برس کی عمر میں شروع کیا ٗ تعلیم کے دوران وہ اپنے ساتھیوں کے ساتھ اکیلی لڑکی تھیں
لاہور28جولائی(ٹی این ایس)پاکستان کے لیجینڈری گلوکار عطاء اللہ خان عیسیٰ خیلوی کی صاحبزادی لاریب عطاء اللہ کئی ہالی وڈ فلموں میں وڑول ایفیکٹس (VFX) آرٹسٹ کے طور پر کام کرچکی ہیں اور اب انہوں نے ’مشن امپوسبل‘ اور ’مشن امپوسبل فال آؤٹ‘ میں بھی اپنی صلاحیتوں کے جوہر دکھائے ۔ لاریب اب تک ’ایکس مین‘، ’گوڈزیلا‘، ’دی وائج آف دی ڈان ٹریڈرز‘ اور ’پرنس کیسپیئن‘ میں بھی وی ایف ایکس آرٹسٹ کے طور پر اپنی مہارت دکھا چکی ہیں۔
لاریب نے اپنا کیریئر 2006 میں 19 برس کی عمر میں شروع کیا اور تعلیم کے دوران وہ اپنے ساتھیوں کے ساتھ اکیلی لڑکی تھیں۔بی بی سی کو انٹرویو دیتے ہوئے لاریب نے بتایا کہ جب میں نے اس کورس کا آغاز کیا تو مجھے VFX کی کوئی سمجھ نہیں تھی، مجھے صرف یہ پتہ تھا کہ یہ فلم کیلئے جادو ہے۔
انہوں نے بتایا کہ جب پہلی مرتبہ فلم ’ٹوائے اسٹوری‘ دیکھی تو میں اس سے بہت متاثر ہوئی جس کو دیکھ کر میں نے سوچا یہ کیسے ہوتا ہے؟ مجھے پہلے نہیں پتہ تھا کہ یہ کیسے ہوتا ہوگا لیکن چونکہ یہ فن اور ٹیکنالوجی پر مشتمل تھا جسے میں کرنا چاہتی تھی۔لاریب نے کہا کہ ان کا مقصد پاکستانی خواتین کو متاثر کرنا ہے اور وہ چاہتی ہیں کہ اس شعبے میں زیادہ سے زیادہ پاکستانی خواتین اور نوجوان آئیں۔پاکستان کی لاریب عطاء نے بطور VFX آرٹسٹ ہالی وڈ میں اپنے قدم جما کر ملک کا نام روشن کردیا ہے جس پر سب کو فخر ہے۔
