کراچی اگست16(ٹی این ایس )کراچی میں سرکاری افسرکو سر عام سڑک پر تشدد کا نشانہ بنانے والے پاکستان تحریک انصاف کے رہنما عمران شاہ بڑی مشکل میں پھنس گئے ہیں کیونکہ ان کی اپنی ہی جماعت نے ان کے خلاف انتہائی سخت قدم اٹھا لیا ہے ۔
تفصیلات کے مطابق پاکستان تحریک انصاف کے رہنما اور رکن قومی اسمبلی نجیب ہارون نے کہاہے کہ پارٹی نے عمران علی شاہ کی پارٹی رکنیت ایک ماہ کیلئے معطل کر دی ہے اور ڈسپلنری کمیٹی معاملات کو دیکھ رہی ہے اور شہری کو پیٹنے کے معاملے پر فیصلہ بھی کمیٹی کرے گی ۔
واضح رہے کہ عمران علی شاہ نے کراچی میں سڑک پر ایک شہری کو سرعام تشدد کا نشانہ بنایا اور تھپڑوں کی بارش کر دی جس کی ویڈیو سوشل میڈیا پر آئی تو تحریک انصاف نے اس کا نوٹس لیا اور رہنما کو شوکاز نوٹس جاری کرتے ہوئے جواب طلب کیا تھا تاہم اب خبر سامنے آئی ہے کہ ان کی پارٹی رکنیت بھی ایک ماہ کیلئے معطل کر دی گئی ہے ۔تاہم یہ بھی بعد میں ہی معلوم ہوا کہ جسے پی ٹی آئی رہنما نے تشدد کا نشانہ بنایا وہ ایک سرکاری افسر ہیں ۔حالات کو خراب ہوتا ہوا دیکھ کر پی ٹی آئی رہنما معافی مانگنے کیلئے اس شخص کے گھر پہنچ گئے اور معافی مانگی اور ان سے صلح کی ۔
