لاہور اگست17(ٹی این ایس) مسلم لیگ (ن) نے سپیکر پنجاب اسمبلی کے انتخاب میں چوہدری پرویز الٰہی کو ووٹ دینے والے (ن) لیگ کے 15 ارکان کی تلاش کرکے ان کے خلاف کارروائی کا فیصلہ کیا ہے۔
ذرائع کے مطابق حمزہ شہباز کی زیر صدارت مسلم لیگ (ن) کا اجلاس منعقد ہوا جس میں سپیکر پنجاب اسمبلی کے انتخاب میں (ن) لیگ کو 15 ووٹ کم ملنے پر تشویش کا اظہار کیا گیا۔اجلاس میں ڈپٹی سپیکر کے الیکشن اور احتجاج کے حوالے سے لائحہ عمل طے کیا گیا اور پارٹی پالیسی کی خلاف ورزی کرنے والے ان 15 ارکان کو تلاش کرکے ان کے خلاف ایکشن لینے کا فیصلہ کیا گیا جنہوں نے اپنی پارٹی چھوڑ کر (ق) لیگ کے امیدوار چوہدری پرویز الہٰی کو ووٹ دیے۔
واضح رہے کہ سپیکر پنجاب اسمبلی کے انتخاب میں چوہدری پرویز الہیٰ کو اپنی نشستوں سے 15 ووٹ زیادہ ملے جبکہ مسلم لیگ (ن) کے امیدوار کو 15 ووٹ کم ملے جس پر (ن) لیگ میں تشویش کی لہر دوڑ گئی ہے۔
