گنتی کی شرط کو ملکی اور بیرون ملک جانے والی تمام پروازوں پر لازمی قراردے دیا گیا
اسلام آباد ستمبر 26 (ٹی این ایس): پی آئی اے کی فضائی میزبان کی گمشدگی کے بعد پی آئی اے انتظامیہ اب پرواز سے قبل مسافروں کی گنتی لازمی قرار دے دی۔ ۔تفصیلات کے مطابق پی آئی اے کا شمار کبھی دنیا کی بہترین فضائی کمپنیوں میں ہوتا تھا ۔ہماری قومی ائیر لائن نے نہ صرف دنیا کی فضاوں پر راج کیا بلکہ بہت سی معروف فضائی کمپنیوں نے پی آئی اے کے ماڈل کو اپنا تے ہوئے اپنا وجود قائم کیا اور آج انکو دنیا کی بہترین فضائی کمپنیاں ہونے کا اعزاز حاصل ہے۔
ایک جانب پی آئی اے نے عروج کا یہ زمانہ دیکھا ہے اور آج پی آئی اے کی زبوں حالی زبان زد عام ہے۔ماضی قریب میں پی آئی اے کو ٹریک پر واپس لانے کے لیے کچھ اصلاحات متعارف کروائی گئی ہیں تاہم ابھی پی آئی اے کو اپنی ساکھ بحال کرنے میں ایک لمبا عرصہ درکار ہے۔اس حوالے سے اب مسافروں کی گنتی کا حکم بھی جاری کیا گیا ہے۔حکم نامہ بروز جمعہ 28 ستمبر سے نافذ العمل ہوگا۔
نئے حکم نامے کے تحت ملکی اور بیرون ملک جانے والی تمام پروازوں پر عمل درآمد لازمی قرار دیا گیا ہے ، یہ حکم نامہ کینیڈا میں فضائی میزبان کی گمشدگی کے بعد جاری کیا گیا ہے۔پرواز کی روانگی سے پندرہ منٹ قبل مسافروں کی گنتی کاک پٹ کریو کے لازمی حوالے کی جائے گی۔سافروں کی گنتی کا موازنہ ٹرم شیٹ سے کیا جائے گا۔پرواز کی روانگی سے قبل کیبن کریو جہاز کے واش روم کی بھی جانچ لازمی کرے گا۔ پی آئی اے کے ترجمان کا کہنا ہے کہ یہ اقدامات مسافروں کی حفاظت کے پیشِ نظر کیے جارہے ہیں ، مسافروں کی گنتی سے کوئی بھی دوسرا مسافر غلطی سے بھی پی آئی اے کے ذریعے سفر نہیں کرسکے گا، اور کینیڈا جیسے کسی واقعے کی اطلاع فوری طور پر عملے کو ہوجائے گی۔
