کراچی جولائی17(ٹی این ایس ) پاکستان فلم پروڈیوسر ایسوسی ایشن کے چیئر مین معروف فلم ساز و ہدایتکار سید نور نے کہا ہے کہ فلم” چین آئے نا’’ پنجاب سنسر بورڈ نے سنسر کردی ہے جبکہ سندھ سنسر بورڈ کے سامنے پیر 17جولائی پیش کی جائیگی۔سید نور نے کہا کہ فلمی صنعت کا ریوائیول کراچی سے ہورہا ہے اسی وجہ سے میں نے مذکورہ فلم کراچی میں ہی مکمل کی ہے وہ گزشتہ روز ایس ایم ای فاؤنڈیشن و بزنس سلوشنز لمیٹڈ کے دفتر میں صدر و چیف ایگزیکٹیو ولی اللہ خان سے گفتگو کررہے تھے جس میں انہوں نے فلمی صنعت اور اس سے وابستہ لوگوں کو درپیش مسائل کی جانب توجہ دلاتے ہوئے کہا کہ فلمی صنعت کے بحران کی وجہ جدید ٹیکنالوجی کا فقدان اور غیر معیاری سینما تھے۔ سید نور نے کہا کہ میری فلم ’’چین آئے نا” کی پرموشن جاری ہے فلم 11اگست کو نمائش کیلئے پیش کی جائیگی انہوں نے کہا کہ فلم کو جدید ٹیکنالوجی کے تحت بنایا گیا ہے یہ سینئر اور جونیئر فنکاروں کا بہترین امتزاج ہے اس فلم میں ندیم ، مصطفی قریشی، عتیقہ اوڈھو، بہروز سبزواری ‘ عادل مراد ، شہروز ، سحرش خان ، صوبیہ خان ودیگر شامل ہیں۔ ایس ایم ای فاؤنڈیشن و بزنس سلوشنز لمیٹڈ کے سی ای او ولی اللہ خان نے سید نور کو ایس ایم ای فاؤنڈیشن و بزنس سلوشنز لمیٹڈ کے اغراض و مقاصد سے آگاہ کرتے ہوئے کہا کہ ہمارا ادارہ فنون لطیفہ سے تعلق رکھنے و الے افراد کی بھرپور مدد کریگا ۔نئے ٹیلنٹ کو سامنے لانے سے ہی فلمی صنعت ترقی کرسکتی ہے اور حکومت کو فلمی صنعت کی سرپرستی کرنی چاہیے۔سید نور نے ولی اللہ خان کا شکریہ ادا کرتے ہوئے ایس ایم ای فاؤنڈیشن و بزنس سلوشنز کو مکمل تعاون کا یقین دلایا اس موقع پر اطہر جاوید صوفی ، سکندر اقبال و دیگر موجود تھے
