اسلام آباد فروری 07 (ٹی این ایس): وزیر اطلاعات چوہدری فواد حسین سے پاکستان جرنلسٹ فاؤنڈیشن (پی جے ایف )کے وفد کی ملاقات ہوئی، وفد میں چیئرمین پاکستان جرنلسٹ فاؤنڈیشن راحت ذوالفقار، صدر رانا عمران لطیف، وائس چیئرمین سینئر ٹی وی اینکر انیق ناجی، چیف آرگنائزر محسن گورایہ اور دیگر شامل تھے ۔
فواد چوہدری کا کہنا تھا کہ تحریک انصاف کی حکومت آزادی اظہار رائے کے بنیادی حق پر کامل یقین رکھتی ہے، آزادی صحافت اور جمہوریت ایک دوسرے کیلئے لازم و ملزوم ہیں، جمہوریت میں ہی آزادی صحافت پنپتی اور فروغ پاتی ہے۔ فلاحی ریاست کے قیام اور ترویج کے لیے آزادی اظہار رائے ناگزیر ہے۔
انھوں نے وفد سے بات چیت کرتے ہوئے کہا کہ صحافیوں کے حقوق کے تحفظ اور بہبود کیلئے تمام ممکن اقدامات کریں گے۔ پاکستان میڈیا ریگولیٹری اتھارٹی کا قیام عمل میں لا رہے ہیں، اتھارٹی کے قیام سے ون ونڈو آپریشن کےذریعے صحافیوں کو سہولت میسر ہو گی۔ میڈیا ورکرز کی دادرسی کے لیے بھی یہ فورم انتہائی سود مند ثابت ہو گا۔ خیبر پختونخوا کی طرز پر جرنلسٹ پروٹیکشن بل لانا چاہتے ہیں۔ صحت انصاف کارڈ کی سہولت بھی صحافیوں کو دی جائے گی۔ ٹیکنالوجی کے استعمال نے میڈیا کی ہئیت تبدیل کر دی ہے۔
میڈیا انڈسٹری کے موجودہ بحران کا تعلق معیشت سے نہیں ٹیکنالوجی سے ہے۔ میڈیا کو از سر نو اپنے بزنس ماڈل کا جائزہ لینا ہو گا۔
