اسلام آباد اپریل 08 (ٹی این ایس): وفاقی وزیر صحت عامر کیانی کا آج ڈریپ کےسربراہ اور فیڈرل ڈرگ انسپیکٹرز کی ٹیم کے ہمراہ اسلام آباد میں ڈسٹریبیوشن آف سرل کمپنی کے ویئر ھاوس پر چھاپہ، ازخود اضافہ کرنے والی ادویات کی قیمتوں کا جائزہ لیا گیا۔ حکومت کی منظور شدہ قیمتوں سے زاید قیمت وصول کرنے والی ادویات کا سٹاک قبضے میں لینے کا حکم۔ وفاقی وزیر صحت عامر محمود کیانی کا کہنا تھا کہ پورے ملک میں غیر قانونی طور پر ادویات کی قیمتوں میں اضافہ کرنے پر ڈرگ ریگولیٹری اتھارٹی کا کریک ڈاؤن جاری ہے۔ ادویات کی قیمتوں میں غیر قانونی اضافے کی اجازت ہر گز نہیں دی جا سکتی۔ خلاف ورزی کرنے والوں کے آہنی ہاتھوں سے نمٹا جائے گا۔ اس مہم کی میں خود نگرانی کروں گا۔ ان کا مزید کہنا تھا کہ غیر قانونی اضافے میں ملوث کمپنیوں کا سٹاک قبضے میں لیا جا رہا ہے۔ ڈرگ ایکٹ کے تحت خلاف ورزی کرنے والوں کے خلاف مقدمات قائم کئے جا رہے ہیں، جن دوا سازکمپنیوں نے حکومت کی منظور شدہ قیمتوں کی خلاف ورزی کی ہے ان کے خلاف سخت کارروائی کی جائے گی۔ کسی کو ادویات کی قیمتوں میں غیر قانونی اضافے کی اجازت نہیں دیں گے۔
