راولپنڈی کینٹ اپریل 26 (ٹی این ایس): ساتھی طالب علموں کیساتھ مل کر زیرِ تعلیم کمسن طالب علم سے زیادتی کرنے والے طالب علم پر مقدمہ درج، ملزمان گن پوائنٹ پر 15 سالہ امریکی نژاد پاکستانی طالب علم کی غیر اخلاقی ویڈیو بنا کر آگے شیئر بھی کرتے رہے۔ متاثرہ طالب علم ڈیڑھ سال قبل تعلیم حاصل کرنے کے لیے پاکستان آیا، ملزمان نے طالب علم کو دوبارہ ویڈیو دکھا کر بلیک میل کرنے کی کوشش کی جس پر اس نے پولیس سے رابطہ کیا۔3 نوجوانوں کے خلاف مقدمہ درج کر کے سینئر طالب علم اور اس کے ایک دوست کو گرفتار کرلیا پولیس نے متاثرہ طالب علم کی میڈیکل رپورٹ پر پندرہ سالہ طالب علم کی مدعیت میں ملزمان کے خلاف زیر دفعہ 377,367A, 292/34 کے تحت مقدمہ درج کرکے تفتیش کا آغاز کردیا۔ڈی ایس پی کینٹ سردار بابر کے مطابق 19 اپریل کو نجی اسکول کا طالب علم خریداری کے سلسلے میں صدر گیا تو وہاں پر ان کے اسکول کے سینئر ساتھی مل گئے جو امریکی نژاد پاکستانی طالب علم کو آئس کریم کھلانے لے گئے۔متاثرہ لڑکے نے بتایا کہ آئس کریم کھانے کے بعد ملزم نے زبردستی اسے گاڑی میں ڈالا اور ایک پارکنگ میں لے گئے اور وہاں اس کا ریپ کرنے کی کوشش کی جب طالب علم نے شور مچایا تو ملزمان نے اس کے منہ کو کپڑے سے بند کردیا۔اس کے بعد ملزمان طالب علم کو کسی ڈیرے پر لے گئے وہاں پر تینوں ملزمان نے اسلحہ کے زور پر مبینہ طور پر اس کا ریپ کیا۔متاثرہ طالب علم نے مزید بتایا کہ اس ساری کارروائی کے دوران غیر اخلاقی ویڈیو بھی بنائی گئی جسے شیئر کیا گیا۔لڑکے نے پولیس کو بتایا کہ بعد ازاں اسکول کے ایک اور سینئر طالب علم نے مذکورہ غیر اخلاقی ویڈیو اسے بھیجی اور بلیک میل کرتے ہوئے اسے بلایا۔متاثرہ طالب علم کے والدین امریکا میں مقیم ہیں اور وہ ڈیڑھ سال قبل پاکستان صرف تعلیم حاصل کرنے کے لیے آیا، لیکن اس واقعے کے بعد اسے والدین کے پاس امریکا بھیجا جارہا ہےایس ایچ او تھانہ کینٹ مرزا جاوید اقبال نے بتایا کہ ملزمان کو گرفتار کر کے تفتیش کی جا رہی ہے جبکہ ایک ملزم فرار ہے جس کے لیے چھاپے مارے جارہے ہیں۔
