اسلام آباد مئی 02 (ٹی این ایس): پاکستان مسلم لیگ (ن) کی مشترکہ پارلیمانی پارٹی نے پبلک اکاﺅنٹس کمیٹی کا چیئرمین اور پارلیمانی لیڈر تبدیل کرنے کی منظوری دے دی ہے. ترجمان مسلم لیگ (ن) نے ایک جاری بیان میں کہا کہ قومی اسمبلی میں اپوزیشن لیڈر شہباز شریف نے موجودہ حالات میں پارٹی قائد محمد نواز شریف سے مشاورت کے بعد یہ فیصلہ کیا تھا، جس پر نواز شریف نے رانا تنویر حسین کو پبلک اکاﺅنٹس کمیٹی کا چیئرمین اور خواجہ آصف کو پارلیمانی لیڈر نامزد کیا.
انہوں نے کہاکہ محمد شہباز شریف شروع سے ہی پبلک اکاﺅنٹس کمیٹی کا چیئرمین بننے کے خواہاں نہیں تھے جبکہ انہوں نے متحدہ اپوزیشن اور پارلیمانی ایڈوئزری گروپ کے اصرار پر پبلک اکاﺅنٹس کمیٹی کے چیئرمین کا عہدہ قبول کیا تھا. ترجمان نے کہا کہ اس وقت کے معروضی حالات کی بنا پہ تمام اپوزیشن جماعتوں اور پارلیمانی ایڈوئزری گروپ کا اصرار تھا کہ قائد حزب اختلاف کو ہی پبلک اکاﺅنٹس کمیٹی کا سربراہ ہونا چاہیے.
بعد ازاں آج پارلیمنٹ ہاﺅس میں پاکستان مسلم لیگ (ن) کی مشترکہ پارلیمانی پارٹی کا اجلاس ہوا، جس میں سابق وزیراعظم اور پارٹی کے سینئر رہنما شاہد خاقان عباسی نے خواجہ آصف کو پارلیمانی لیڈر نامزد کیا، جس کی منظوری پارلیمانی پارٹی نے دے دی. اس حوالے سے شاہد خاقان عباسی کا کہنا ہے کہ خواجہ آصف کو پارلیمانی لیڈر شہباز شریف کی خواہش بنایا جا رہا ہے، انہوں نے کہا کہ خواجہ آصف متحرک اور سینئر پارلیمینٹیرین ہیں.
علاوہ ازیں مسلم لیگ (ن) کی پارلیمانی پارٹی نے رانا تنویر کو چیئرمین پی اے سی مقرر کرنے کی منظوری بھی دی، اس سے قبل اپوزیشن لیڈر شہباز شریف پی اے سی کے چیئرمین تھے. ذرائع نے بتایا کہ اسپیکر کو چیئرمین پی اے سی کی تبدیل حوالے سے لکھا جائے گا، جس کے بعد اسپیکر آفس نئے چیئرمین کا تقرر اور نوٹیفیکشن جاری کریں گے. ادھر ذرائع نے یہ بھی بتایا کہ اپوزیشن لیڈر شہباز شریف نے لندن میں قیام میں توسیع کردی ہے اور وہ اب 7 مئی کو پاکستان واپس نہیں آئیں گے. ذرائع کا کہنا ہے کہ شہباز شریف نے اپنے معالج کے مشورہ پر لندن میں قیام میں توسیع کا فیصلہ کیا کیونکہ اپوزیشن لیڈر کا 8 اور 12 مئی کو لندن میں دوسرا طبعی معائنہ ہوگا.
