, منصوبوں کی آڑ میں کرپشن کرنیوالے ملک و قوم کے مجرم ، قومی وسائل پر ڈاکہ ڈالنے کا دور واپس نہیں آئیگا، محنت سے مسائل پر قابو پائینگے , ماضی کی حکومتوں نے ریکارڈ قرضے لے کر معیشت کا بیڑہ غرق کیا، قرضے ملک کی ترقی پر صرف ہوتے تو بچہ بچہ مقروض نہ ہوتا‘وزیراعلیٰ پنجاب
لاہور مئی 30 (ٹی این ایس): وزیراعلیٰ پنجاب سردار عثمان بزدار سے اسلام آباد میں وفاقی وزیر سید علی حیدر زیدی نے ملاقات کی جس میں باہمی دلچسپی کے امور اور سیاسی صورتحال پر تبادلہ خیال کیا گیا۔ وزیراعلیٰ عثمان بزدار نے اس موقع پر گفتگو کرتے ہوئے کہا کہ ماضی کی حکومتوں نے ریکارڈ قرضے لے کر ملکی معیشت کا بیڑہ غرق کیا اور اگر یہ قرضے ملک کی ترقی اور عوام کی خوشحالی پر صرف ہوتے تو آج پاکستان کا بچہ بچہ مقروض نہ ہوتا، مگر بدقسمتی سے سابق حکومتوں نے پاکستان کے ساتھ ظلم کیا۔
انہوں نے کہا کہ وزیراعظم عمران خان کی قیادت میں تحریک انصاف کو تباہ حال معیشت ملی اورہماری حکومت سابق ادوار کے کانٹوں کو چن چن کر صاف کر رہی ہے۔راستہ کٹھن ضرور ہے لیکن ہمارا عزم اور حوصلہ اس سے کہیں بلند ہے۔ انہوں نے کہا کہ مشکل فیصلے ملک کے روشن مستقبل کیلئے کئے گئے ہیں اور ہم محنت اور جہد مسلسل سے پاکستان کے مسائل پر قابو پائیں گے اور وہ وقت دور نہیں جب پاکستان اپنے پائوں پر کھڑا ہوگا۔
رکن پنجاب اسمبلی محمد اشرف رند بھی اس موقع پر موجود تھے۔وزیر اعلی پنجاب سردار عثمان بزدار سے اسلام آباد میں وزیر اعظم کی معاون خصوصی برائے اطلاعات ڈاکٹر فردوس عاشق اعوان نے ملاقات کی۔ وزیراعلیٰ عثمان بزدار نے اس موقع پر گفتگو کرتے ہوئے کہا کہ قومی وسائل پر ڈاکہ ڈالنے کا دور کبھی واپس نہیں آئے گا۔ منصوبوں کی آڑ میں کرپشن کرنے والے ملک و قوم کے مجرم ہیں۔
سابق حکمرانوں نے نمود و نمائش کے منصوبوں میں قومی وسائل برباد کئے اور قومی وسائل کی بندربانٹ کرکے ذاتی تجوریاں بھری گئیں۔ لوٹ مار کرنے والوں کو اپنے کئے کا حساب دینا ہوگا۔ کرپٹ عناصر کے بلاامتیاز احتساب سے ہی پاکستان آگے بڑھے گا۔ انہوں نے کہا کہ وزیراعظم عمران خان کی قیادت میں تحریک انصاف کی حکومت قومی وسائل کو عوام کی امانت سمجھتی ہے اور ہماری قیادت نے قومی وسائل اپنی ذات پر خرچ کرنے کی غلط روایت کو ختم کیا ہے۔
اب عوام کا پیسہ فلاح عامہ پر ہی صرف ہو رہا ہے۔ تنقید کی پرواہ کئے بغیر عوامی خدمت کے سفر کو جاری رکھیں گے۔ عوامی خدمت کے نئے ریکارڈ قائم کرکے عوام کے مینڈیٹ کی لاج رکھیں گے۔ فردوس عاشق اعوان نے کہا کہ وزیر اعلی عثمان بزدار پنجاب میں عوام کی بے لوث خدمت کر رہے ہیں۔ اپوزیشن کا بیانیہ کرپشن پر پردہ ڈالنے کا بیانیہ ہے۔ اپوزیشن جماعتوں کو پاکستان کے عوام کے مسائل سے کوئی سروکار نہیں۔
یہ جماعتیں عوامی مسائل میں اضافے کی ذمہ دار ہیںاور اب بلاجواز شور مچا رہی ہیں۔انہو ںنے کہا کہ عام انتخابات میں مسترد عناصر کی منفی سیاست دم توڑ چکی ہے جبکہ حکومت عوام کے مسائل حل کرنے کیلئے ہر ممکن اقدام اٹھا رہی ہے۔ وزیراعلیٰ پنجاب عثمان بزدارنے کرکٹ ورلڈ کپ کے میچوں کے آغاز پر قومی کرکٹ ٹیم کیلئے نیک خواہشات کا اظہار کیا ہے۔
وزیراعلیٰ نے اپنے پیغام میں کہا کہ میری اور قوم کی دعائیں قومی کرکٹ ٹیم کے ساتھ ہیں اور اللہ تعالیٰ سے دعا ہے کہ پاکستانی کرکٹ ٹیم ورلڈکپ کی فاتح بنے۔ انہوں نے کہا کہ قوم کھلاڑیوں سے اچھی کارکردگی اور جیت کی امید رکھتی ہے اور توقع ہے کہ پاکستانی کرکٹ ٹیم ہر میچ میں شاندار کارکردگی کا مظاہرہ کرکے کامیابی حاصل کرے گی۔ورلڈ کپ جیتنے کیلئے قومی کھلاڑیوں کو محنت ، جذبے اور عزم سے کھیلنا ہوگا۔
انہوں نے کہا کہ دیگر ٹیمیں بھی مکمل تیاری کے ساتھ میدان میں اتر رہی ہیں، لہٰذا پاکستانی کھلاڑیوں کو جیت کیلئے بیٹنگ، بائولنگ اور فیلڈنگ میںبھرپور صلاحیتوں کا مظاہرہ کرنا ہوگا اور یقینا ورلڈ کپ میں کرکٹ شائقین کو عمدہ کھیل دیکھنے کو ملے گا۔ وزیراعلیٰ پنجاب سردار عثمان بزدار نے سینئر صحافی ادریس بختیار کے انتقال پر گہرے دکھ اور افسوس کا اظہار کیا ہے۔
وزیراعلیٰ نے اپنے تعزیتی پیغام میں سوگوار خاندان سے دلی ہمدردی اور تعزیت کا اظہار کرتے ہوئے دعا کی کہ اللہ تعالیٰ مرحوم کی روح کو جوار رحمت میں جگہ دے اور غمزدہ خاندان کو صبر جمیل عطا فرمائے۔وزیراعلیٰ عثمان بزدار نے شعبہ صحافت کیلئے ادریس بختیار کی شاندار خدمات کو خراج عقیدت پیش کرتے ہوئے کہا کہ مرحوم میڈیا انڈسٹری کا بہت بڑا نام تھے اور وہ ذمہ دارانہ صحافت کے علمبردار رہے۔ انہوں نے کہا کہ ادریس بختیار نے صحافت کے میدان میں انمٹ نقوش چھوڑے ہیں اور مرحوم کی صحافتی خدمات کو فراموش نہیں کیا جاسکتا۔
