لاہورجولائی20 (ٹی این ایس ) امیر جماعت اسلامی لاہور ذکراللہ مجاہد نے کہاہے کہ پنجا ب حکومت نے میگا پراجیکٹس ، میٹروبس اور اورنج لائن ٹرین کو ہی اپنی تو جہ کا مرکز بنا رکھا ہے جبکہ عوام غربت ، بے روزگاری ، مہنگائی ، لوڈشیڈنگ اور بدامنی کے منحوس چکر میں بری طرح پس رہی ہے ۔ ان خیالات کا اظہار گذشتہ روز انہوں نے عوامی وفود سے ملاقات کے دوران کیا۔ انہوں نے مزید کہا کہ شہری ٹریفک مسائل ،گندگی کے ڈھیر ، صاف پانی کی عدم دستیابی، قبضہ مافیا، منشیات فروشی اورسٹریٹ کرائم جیسے مسائل سے پریشان ہیں ۔حکمرانوں کے کرپشن کے انکشافات کے بعد عوام کے صبر کا پیمانہ لبریز ہو چکا ہے اور عوام ا ب ملک میں ایک صالح، ایماندار اور کرپشن سے پاک قیادت کو دیکھنا چاہتی ہے کیونکہ حکمرانوں نے چار سالہ دور حکومت میں ملکی معیشت کا جنازہ نکال دیا ہے اور قرضوں کے تمام سابقہ ریکارڈ توڑ دیئے اور ملک کا بچہ بچہ مقروض ہو گیا ہے ۔انہو ں نے کہا کہ تمام سرکاری اداروں میں کرپشن حکومتی سرپرستی میں ہو رہی ہے جس سے شہر بھر کے عوام میں سخت غصہ پایا جاتا ہے ۔کسی بھی سرکاری دفتر میں بنا سفارش یا رشوت کے کوئی کام نہیں ہوتا تمام سرکاری دفاتر میں بیٹھے افسران عوام مسائل پر ذاتی مفادات ، تعلقات ، پسند اور نا پسند کو ترجیح دیتے ہیں ۔اس کرپٹ نظام اور مافیا کے کام کرنے کے طریقہ کار اور رویے سے غریب عوام تنگ آچکی ہے ۔ موجودہ حکومت عوامی مسائل کے حل کی بجائے مزید اضافہ کا باعث بنی ہے کیونکہ حکمرانوں کی ترجیحات میں عوامی مسائل کا حل شامل ہی نہیں ہے ۔ انہو ں نے کہا کہ جماعت اسلامی ملک میں ایسا نظام چاہتی ہے کہ جس میں انصاف سب کیلئے مساوی اور عام ہو ، کسی بھی محکمے میں کرپشن اور رشوت رکاوٹ نہ بنے جماعت اسلامی ملک کو ایک اسلامی ،پر امن اور خوشحال پاکستان بنانا چاہتی ہے
