لاہور ستمبر 16 (ٹی این ایس): وزیراعلیٰ پنجاب سردار عثمان بزدار نے سعودی عرب سے صوبائی کابینہ کمیٹی برائے پرائس کنٹرول کو ہدایات دیتے ہوئے کہا ہے کہ صوبے میں مصنوعی مہنگائی کے ذمہ داروں کے خلاف کریک ڈاؤن کیا جائے اوراشیائے ضروریہ کی مقرر کردہ نرخوں پر فروخت کو ہر صورت یقینی بنایاجائے۔انہوں نے کہا کہ مہنگے داموں اشیائے ضروریہ فروخت کرنے والوں سے کوئی رعایت نہیں ہوگی۔
انتظامی افسران پرائس کنٹرول کیلئے خود مارکیٹوں اوربازاروں کے دورے کریں ۔انہوںنے کہا کہ پرائس کنٹرول کے اقدامات پر عملدرآمد کے حوالے سے بہانے بازی نہیں چلے گی۔ وزیراعلیٰ نے مصنوعی مہنگائی پر قابوپاکرصوبے کے عوام کو ریلیف دینے کے لئے عملی اقدامات کرنے کا حکم دیتے ہوئے کہا کہ صوبے کے عوام کو کسی بھی صورت مصنوعی مہنگائی پیدا کرنے والوں کے رحم و کرم پر نہیں چھوڑا جاسکتا۔
زبانی جمع خرچ نہیں بلکہ عوام کو ریلیف دینے کیلئے گرائونڈ پر اقدامات نظر آنے چاہئیں۔ پرائس کنٹرول مجسٹریٹس دفاتر سے باہر نکلیں اور مارکیٹوں اور بازاروں میں اشیاء کی قیمتوں کو چیک کریں۔ انہوںنے کہا کہ سبزیوں، پھلوں اور دالوں کی قیمتوں میں مصنوعی اضافہ کسی صورت برداشت نہیں کیا جائے گا۔وزیراعلیٰ نے مزید ہدایت کی کہ ضلع کی سطح پر پرائس کنٹرول کمیٹیوں کو فعال انداز میں کام کرنا ہوگا۔
وزیراعلیٰ پنجاب سردارعثمان بزدارنے بھکر میں طالبہ سے اجتماعی زیادتی کے واقعہ کا نوٹس لیتے ہوئے آر پی او سرگودھا سے رپورٹ طلب کرلی ہے ۔وزیراعلیٰ نے ملزمان کی جلد سے جلد گرفتاری کا حکم دیتے ہوئے کہا کہ ملزمان خواہ جتنے بھی بااثر کیوں نہ ہو قانون کے تحت کارروائی عمل میں لائی جائے ۔انہوںنے کہا کہ زیادتی کا شکار طالبہ کو ہر صورت انصاف فراہم کیا جائے گا۔
وزیراعلیٰ نے ڈی پی او بھکر کو متاثرہ خاندان کی رہائشگاہ جا کر دادرسی کی ہدایت کی ۔وزیراعلیٰ پنجاب سردار عثمان بزدار نے ڈی آئی جی طیب حفیظ چیمہ کی والدہ کے انتقال پر گہرے دکھ اور افسوس کا اظہار کیا ہے۔ وزیراعلیٰ نے اپنے تعزیتی پیغام میں سوگوار خاندان سے دلی ہمدردی اور تعزیت کا اظہار کرتے ہوئے دعا کی کہ اللہ تعالیٰ مرحومہ کی روح کو جوار رحمت میں جگہ دے اور غمزدہ خاندان کو صبر جمیل عطا فرمائے۔
