لاہور نومبر 06 (ٹی این ایس): سابق وزیراعظم نواز شریف جاتی امرا پہنچ گئے۔ نواز شریف کے جاتی امرا پہنچنے پر ان کے ذاتی معالج ڈاکٹر عدنان نے مائیکروبلاگنگ ویب سائٹ ٹویٹر پر ایک پیغام جاری کیا جس میں انہوں نے جاتی امرا میں نواز شریف کے لیے بنائے گئے میڈیکل یونٹ کی تصاویر بھی شئیر کیں۔ ٹویٹر پیغام میں ڈاکٹر عدنان نے کہا کہ نواز شریف کو مزید علاج کے لیے شریف میڈیکل سٹی کے خصوصی میڈیکل بورڈ کی زیر نگرانی منتقل کردیا گیا ہے۔
انہوں نے بتایا کہ نواز شریف کے لیے جدید آلات سے لیس میڈیکل یونٹ بنایا گیا ہے جہاں چوبیس گھنٹے اسٹاف بھی موجود ہو گا۔ انہوں نے مزید بتایا کہ نواز شریف کی طبیعت بدستور ناساز ہے جبکہ ان کے پلیٹ لیٹس کی تعداد 26 ہزار ہو گئی ہے۔
Former PM #NawazSharif transferred under care of a Special Medical Board formed by Sharif Medical City for further management.
A specialised HDU is established for this purpose which is appropriately equipped & staffed 24/7.
His condition remains unstable.
(Platelet count 26K). pic.twitter.com/uH3n5peidM— Dr. Adnan Khan (@Dr_Khan) November 6, 2019
خیال رہے کہ سابق وزیراعظم نواز شریف کو اب سے کچھ دیر قبل سروسز اسپتال سے ڈسچارج کیا گیا جس کے بعد انہیں ان کی رہائشگاہ جاتی امرا منتقل کر دیا گیا۔
سابق وزیراعظم نواز شریف اپنی رہائش گاہ جاتی امرا پہنچے تو کارکنوں کی ایک بڑی تعداد بھی جاتی امرا میں موجود تھی جنہوں نے نواز شریف کے گھر پہنچنے پر پھولوں کی پتیاں نچھاور کیں اور اپنے قائد کے حق میں نعرے لگائے ۔ طویل عرصہ کے بعد اپنے گھر پہنچنے پر سابق وزیراعظم نواز شریف نے قبروں پر حاضری دی اور فاتحہ خوانی کی۔ میاں نواز شریف نےاپنے والد میاں شریف, اہلیہ بیگم کلثوم نواز اور بھائی عباس شریف کی قبر پر حاضری اور فاتحہ خوانی کی۔
اور اس موقع پر ان کے ہمراہ ان کی والدہ شمیم اختر، بھائی شہباز شریف اور صاحبزادی مریم نواز بھی موجود تھیں۔یاد رہے کہ اب سے کچھ دیر قبل سابق وزیراعظم نواز شریف کو سروسز اسپتال سے روانہ کیا گیا۔ سروسز اسپتال سے روانگی کے وقت ان کے ہمراہ مریم نواز ، ان کی والدہ اور ڈاکٹر عدنان بھی موجود تھے۔