ایم کیو ایم لندن کے ٹارگٹ کلر کا فاروق ستار سے رابطے کا انکشاف

 
0
263

کراچی نومبر 20 (ٹی این ایس): ایم کیو ایم لندن کے ٹارگٹ کلر کا فاروق ستار سے رابطے کا انکشاف ہوا ہے۔ ذرائع کے مطابق کراچی پولیس نے ایم کیو ایم لندن کے ٹارگٹ کلر یوسف عرف ٹھیلے والا کو ایک کارروائی کے دوران گرفتار کیا ہے جس نے دورانِ تفتیش سابق رہنما ایم کیو ایم پاکستان فاروق ستار سے رابطے کا انکشاف کیا ہے۔ پولیس کے مطابق پولیس نے ایک کارروائی کے دوران ایم کیو ایم لندن سے تعلق رکھنے والے ٹارگٹ کلر یوسف عرف ٹھیلے والا کو گرفتار کیا جس نے دوران تفتیش 96 افراد کی ٹارگٹ کلنگ کا انکشاف کیا ہے۔
شہر قائد کے علاقے سولجر بازار میں پولیس نے کامیاب کارروائی کرتے ہوئے یوسف عرف ٹھیلے والا کو گرفتار کیا۔ ایس ایس پی ایسٹ نے پریس کانفرنس کے دوران بتایا ہے کہ گرفتار ملزم نے 1995 میں ایم کیو ایم میں شمولیت اختیار کی اور پہلی مرتبہ 1996 میں رینجرز کے ہاتھوں گرفتار ہوا تاہم ایک سال بعد رہا ہو گیا، ملزم کے ہاتھوں قتل ہونے والوں میں فورسز کے لوگ بھی شامل ہیں۔
یوسف عرف ٹھیلے والا نے دوران تفتیش سابق رہنما ایم کیو ایم پاکستان فاروق ستار سے رابطہ کا انکشاف کرتے ہوئے کہا کہ فاروق ستار سے نائن زیرو میں ملاقات ہوتی تھی، سیکٹر انچارج خالد صدیقی اور ندیم ماربل نے فاروق ستار سے ملاقات کروائی، 90 میں رہائش کا بندوبست فاروق ستار کرواتے تھے۔ یوسف عرف ٹھیلے والا نے بتایا ہےکہ قیادت کے کہنے پر قتل کی واردتیں کرتا تھا، ہمیں رہنماؤں سے ہدایات ملتی تھیں تو وارداتیں کرتے تھے جب کہ ٹھیلے پر رکھ کر لاشیں ٹھکانے لگاتا تھا۔
پولیس نے یوسف ٹھیلے والا کو عدالت میں پیش کیا جہاں 23 نومبر تک ملزم کا جسمانی ریمانڈ منظور کرلیا گیا ہے۔ سابق رہنما ایم کیو ایم (پاکستان) فاروق ستار نے گرفتار ٹارگٹ کلر سے رابطے کی تردید کرتے ہوئے کہا کہ ملزم سے یہ کون کہلوا رہا ہے، میرے خلاف سازش ہورہی ہے جو سامنے آجائے گی تاہم میں سختی سے اس بیان کی تردید کرتا ہوں۔ انہوں نے کہا کہ میں کبھی نائن زیرو کا کئیر ٹیکر نہیں رہا یہ ذمہ داری عامر خان، کنور نوید اور انیس قائم خانی کے پاس رہی ہے جبکہ میں پارٹی کے تنظمی سیٹ اپ کا بھی کبھی انچارج نہیں رہا، میں نے ہمشہ سیاسی سیٹ اپ کی ذمہ داری نبھائی ہے۔