اسلام آباد جولائی 23 (ٹی این ایس ):مسلم لیگ (ن) کے رہنماؤں وزیر مملکت طارق فضل چوہدری اور دانیال عزیز کی پریس کانفرنس کے دوران صحافیوں نے گذشتہ دنوں پمز ہسپتال میں خاتون صحافی کو ہراساں کرنے اور اس کے ساتھ بدتمیزی کے خلاف شدید احتجاج کرتے ہوئے شیم شیم کے نعرے لگائے جبکہ وزیر مملکت طارق فضل چوہدری نے یقین دہانی کرائی کہ بد تمیزی کر نے والے اہلکاروں کے خلاف کارروائی کرینگے ۔ اتوار کومسلم لیگ(ن) کے رہنماؤں دانیال عزیز اور طارق فضل چوہدری پی آئی ڈی میں پریس کانفرنس کرنے آئے تو وہاں موجود صحافیوں نے گذشتہ دنوں پمز ہسپتال میں صحافیوں کو ہراساں کرنے اور بدتمیزی کے خلاف شدید احتجاج کیا اور شیم شیم کے نعرے لگائے اس دوران وزیر مملکت طارق فضل چوہدری کا کہنا تھا کہ بدتمیزی کرنے والے اہلکاروں کے خلاف کارروائی کریں گے ٗ وزرات داخلہ سے مکمل رابطے میں ہیں ٗایف آئی اے اہلکاروں کے خلاف کارروائی ہوگی۔ پمز انتظامیہ نے جو کیا وہ سراسر زیادتی ہے ٗانتظامیہ کے خلاف بھی بھرپور کارروائی کی جائیگی۔ انہوں نے کہاکہ اگلے24گھنٹوں کے دوران ایف آئی آر درج کر لی جائیگی۔ پمز انتظامیہ سے واقعہ کی فوٹیج منگوا لی ہے۔ اس موقع پر صحافی رہنماؤں فاروق فیصل خان ،عمران ڈھلوں،علی رضا علوی اور دیگرنے کہاکہ اگر اگلے 24گھنٹوں میں اہلکاروں کیخلاف کارروائی نہ کی گئی تو مسلم لیگ کی کسی بھی پریس کانفرنس میں شریک نہیں ہوں گے ۔بعد ازاں طارق فضل چوہدری کی یقین دہانی کے بعد صحافی پریس کانفرنس کیلئے بیٹھ گئے۔
