اقوام متحدہ 02 مارچ 2022 (ٹی این ایس): اقوام متحدہ کے سیکرٹری جنرل انتونیو گوترش نےیوکرین میں بڑھتی ہوئی انسانی ضروریات کو پورا کرنے اور تنازعات کے خاتمے کی کوششوں کے لیے وسائل کی ضرورت پر زور دیا۔
انہوں نے یوکرین کے لیےفوری اپیل اور پڑوسی ممالک کے لیے علاقائی پناہ گزینوں کے ردعمل کے منصوبے کے آغاز کے موقع پر کہا کہ عالمی برادری کو یوکرین کے اس برے وقت میں ان کی مدد کرنی چاہیے اور ان کی حمایت کر نی چاہیے ۔
انہوں نے بتایا کہ یوکرین کے لیے تین ماہ کی فوری اپیل کے لیے 1.1 بلین امریکی ڈالر درکار ہیں تاکہ فوجی کارروائیوں سے متاثر اور بے گھر ہونے والے 60 لاکھ سے زیادہ لوگوں کی انسانی ضروریات کو پورا کیا جا سکے۔ علاقائی رسپانس پلان کو یوکرین کے لوگوں کی مدد کے لیے 551 ملین ڈالر کی ضرورت ہے جو سرحدوں کے پارخاص طور پر پولینڈ، ہنگری، رومانیہ اور مالدووا میں بھاگ گئے ہیں۔انہوں نے خبردار کیا کہ یوکرین کا بحران دنیا بھر کے کمزور لوگوں پر سنگین اثرات مرتب کر سکتا ہے ۔
انہوں نے کہاکہ یوکرین اناج کا ایک اہم ذریعہ ہے اور ورلڈ فوڈ پروگرام اپنی آدھی سے زیادہ گندم یوکرین سے خریدتا ہے۔
انہوں نے خبردار کیا کہ فصل کی کٹائی میں رکاوٹ قیمتوں کو بڑھا سکتی ہے اور عالمی بھوک میں اضافہ کر سکتی ہے۔ انہو ں نے مزید کہاکہ ہمیں ہر جگہ امن کے لیے اپنی کوششوں کو تیز کرنا چاہیےؕ ۔
انہوں نے کہا کہ اقوام متحدہ کی ایجنسیاں اور شراکت دار ہر وقت انسانی ضروریات کا جائزہ لینے خاص طور پر خواتین، بچوں، بوڑھوں اور معذور افراد کے لیےاور امداد کو بڑھانے کے لیے کام کر رہے ہیں۔ انہوں نے کہا کہ اقوام متحدہ یوکرین کے اندر اور باہر تنظیموں اور گروپوں کے درمیان شراکت داری کو مربوط کر رہا ہے۔
انہوں نے کہا کہ ہمارے کارکنوں کو تمام متاثرہ افراد اور کمیونٹیز تک بلا روک ٹوک رسائی کی ضمانت بھی ہونی چاہیے۔ انہوں نے کہاکہ میں تمام فریقوں سے بین الاقوامی انسانی قانون کے تحت اپنی ذمہ داریوں کو نبھانے کی اپیل کرتا ہوں ۔
