اسلام آباد 09 اپریل 2022 (ٹی این ایس): تحریک عدم اعتماد پر ووٹنگ کیلئے ہونے والے قومی اسمبلی کے اجلاس میں پی ٹی آئی رہنما سینیٹر فیصل جاوید کو اسمبلی ہال سے نکال دیا گیا۔تفصیلات کے مطابق اسپیکر اسد قیصر کی زیر صدارت قومی اسمبلی کا اجلاس ہورہا ہے جس میں اپوزیشن کے 176 اور حکومت کے تقریبا 100 ارکان شریک ہیں۔
سیکیورٹی نے سینیٹر فیصل جاوید کو اسمبلی ہال سے باہر نکال دیا۔ فیصل جاوید ہال کے اندر آگئے تھے جس پر ہال میں موجود سکیورٹی عملہ نے انہیں باہر نکالا۔قبل ازیں سینیٹر فیصل جاوید بھی ایوان زیریں کی کارروائی دیکھنے کیلئے پارلیمنٹ پہنچے۔ اس موقع پر انہوں نے میڈیا سے گفتگو کرتے ہوئے کہا کہ عمران خان قوم کیلئے ڈٹ کے کھڑے ہیں، وہ بھگوڑوں کی طرح باہر نہیں بھاگیں گے، عدالتی فیصلے کی قدر کرتے ہیں، جس پر من و عن عمل کیا جائے گا۔
انہوں نے مزید کہا کہ اپوزیشن کے تین ایجنٹس نے پارلیمنٹ پر حملہ کیا ہے، ضمیر فروشی کرکے انہوں نے آئین سے غداری کی ہے۔
