اسلام آباد 20 جون 2022 (ٹی این ایس): سیکشن 21 میں ترمیم سے مریم نواز کا آیون فیلڈ کیس ختم ہو جائیگا اور سیکشن 4 میں ترمیم سے راجہ پرویز اور شاہد خاقان عباسی کے کیسز کو فائدہ ہوگا۔
تحریک انصاف کے رہنما اور سابق وزیر اطلاعات فواد چوہدری نے پریس کانفرنس کرتے ہوئے کہا ہے کہ نیب قوانین میں ترمیم کرکے شریف خاندان کو فائدہ دیا جارہا ہے۔ فواد چوہدری کا کہنا تھا کہ کل عمران خان کی کال پر عوام باہر نکلی کیونکہ پی ٹی آئی وفاق کی جماعت کی حیثیت اختیار کر گئی ہے۔
انہوں نے کہا کہ اس امپورٹڈ حکومت کو عوام نے مسترد کیا اور احتجاج میں شریک ہوئے ، کوئٹہ سے کراچی اور کنڈی کوتل تک لوگ باہر آئے۔فواد چوہدری نے کہا ہے کہ عمران خان بارہا کہتے ہیں پاکستان دو ہی قوتیں ہیں ایک افواج پاکستان اور دوسرا پی ٹی آئی، پی ٹی آئی نے وفاق اور نیشنل ازم کی بات کی ہے۔انہوں نے کہا کہ ن لیگ نے پہلا این آر او پرویز مشرف سے لیا ، این آر او 1 کے تحت شریف خاندان اور زرداری کے کیسز ختم ہوگئے۔
فواد چوہدری نے کہا ہے کہ تحریک انصاف نیب قوانین میں ترمیم کے خلاف یوم سیاہ منارہی ہے ، نیب قوانین میں ترمیم کرکے شریف خاندان اور زرداری صاحب کو فائدہ دیا جارہا ہے۔تحریک انصاف کے رہنما کا کہنا تھا کہ نیب قانون کا سیکشن 14 ختم کردیا گیا ، سیکشن 14 کے مطابق ممنوعہ رقم کے حوالے سے ثبوت ملزم فراہم کرتا تھا ۔انہوں نے مزید کہا کہ سیکشن 21 میں ترمیم سے مریم نواز کا آیون فیلڈ کیس ختم ہو جائیگا اور سیکشن 4 میں ترمیم سے راجہ پرویز اور شاہد خاقان عباسی کے کیسز کو فائدہ ہوگا۔
