اسلام آباد 26 جون 2022 (ٹی این ایس): مذاکرات جاری :سعودی عرب سے پاکستانیوں کیلئے بڑی خوشخبری آنے کا امکان
پاکستان کو سعودی عرب سے 1.2 ارب ڈالر کے بجائے 3.6 ارب ڈالر کے ادھار تیل کے لئے مذاکرات جاری ہیں۔سابق دور حکومت میں سعودی عرب نے گزشتہ سال پاکستان کو 4.2 ارب ڈالر کا پیکج دیا تھا، پیکج میں 1.2 ارب ڈالر کی مخر ادائیگی پر تیل کی سہولت بھی شامل تھی،
اب سعودی عرب کی جانب سے پاکستان کو ادھار تیل کی فراہمی کی سہولت میں توسیع ملنے کا امکان ہے جس کیلئے دونوں ممالک کے حکام کے درمیان مذاکرات جاری ہیں۔ پاکستان حکام نے سعودی عرب سے درخواست کی ہے کہ مئوخر ادائیگی پر جو تیل کی سہولت ہے اس میں توسیع کی جائے اور سالانہ 1.2 ارب ڈالر کے بجائے 3.6 ارب ڈالر کی سہولت دی جائے تاہم سعودی عرب کی جانب سے یہ سہولت جلد ملنے کی توقع ہے۔ اگر پیکج میں توسیع ہوجاتی ہے تو پاکستان کو یومیہ 30 کروڑ ڈالر کا ادھار تیل فراہم کیا جائے گا جبکہ اس وقت پاکستان کو سعودی عرب کی جانب سے یومیہ 10 کروڑ ڈالر کا ادھار تیل فراہم کیا جارہا ہے۔
