وفاقی وزیر اطلاعات و نشریات مریم اورنگزیب آکھیے تحریک انصاف دے اپݨے لوکاں پاناماسازش کوں بے نقاب کیتا ، سازشی کرداراں ھک نالائق کوں مسلط کرتے ملک کوں تباہی آلے پاسے سٹیا ، ملک دے مسئلیں دا حل صرف نواز شریف کنے ہے ، انہاں کوں پاکستان دے عوام ووٹ ݙے تے تریجھی واری وزیراعظم منتخب کیتا، نواز شریف دور اچ معیشت مستحکم تھئی ، عوام کوں سی پیک دا تحفہ ݙتا، ملک دی وݙی خدمت کرݨ آلیں دے نال وݙی زیادتی تھئی ، جیڑھیاں شکلاں تے کردار اڄ ملک سڑیندے پئن ، یہ14-2013 اچ سی پیک منصوبہ روکݨ کیتے کنٹینر تے کھڑے ہن ۔ پریس کانفرنس توں خطاب کریندے ہوئیں وفاقی وزیر اطلاعات آکھیے اڄ 5 جولائی دا ݙینھ اے تے اڄ دے ݙینھ ھک آمر شہید ذوالفقار علی بھٹو دی حکومت تے شب خون مار تے جمہوریت دا قتل کیتا ہئی، اڄ کیپٹن کرنل شیر خان شہید دی برسی دا وی ݙینھ اے تے اڄ سی پیک دے ݙاہ سال وی مکمل تھیندے پئن ۔ انہاں آکھیے سی پیک پاکستان اتے چین دی قیادت دا خطے اتے پاکستان دے عوام کیتے تحفہ اے ، اے منصوبہ قائد محمد نواز شریف اتے صدر شی جن پنگ دا وژن اے۔ انہاں آکھیے سی پیک منصوبے پاکستان کوں 2013ء توں 2018ءتئیں ہر شعبے اچ ترقی ݙتی لیکن پچھلے چار سالاں اچ ھک سازشی، نااہل، نالائق اتے چور ملک کوں صرف تباہی آلے پاسے سٹیا ۔ انہاں آکھیے وزیراعظم شہباز شریف اتحادی حکومت نال رل تے پچھلے ھک سال اچ ملک دی معاشی تباہی، بدحالی، بے روزگاری، لوڈ شیڈنگ اتے دہشت گردی ختم کرݨ دیاں کوششاں اچ مصروف ہن۔ انہاں آکھیے سازشی عناصر ھک نااہل، نالائق اتے چور کوں ملک تے مسلط کیتا، اے کہانی صرف چار سال دی نی، ایندی شروعات 2013ءاچ تھی چکی ہئی ۔ 2013ءاچ وی ملک دے اندر مہنگائی، دہشت گردی، بے روزگاری ہئی، ملک ڈیفالٹ دی نہج تے ہئی تے لوکاں سمجھ ڳھدا ہئی جو ملک دی مشکلات دا حل صرف نواز شریف کنے ہے ، عوام نواز شریف کوں ووٹ ݙے تے تریجھی واری وزیراعظم منتخب کیتا، اوں ویلھے پاکستان ھک اوکھے دورتوں لنگھدا پیا ہئی ، نواز شریف ملک اچ سیاسی استحکام دی بنیاد رکھی، صوبیں اچ اکثریت رکھݨ آلیاں جماعتاں کوں اتھاں حکومتاں بݨاوݨ دا موقع ݙتا ، نواز شریف ترائے سالاں اچ ملک دی خراب صورتحال بدلی ہئی۔ ، سی پیک دا منصوبہ شروع تھیندے ہی سازشی عناصر متحرک تھی ڳئے ہن ۔ انہاں آکھیے جݙاں صدر شی جن پنگ دے دورہ پاکستان دی خبر آئی تاں ھک بندے ملک دی ترقی دے خلاف کنٹینر تے کھڑا ہئی، اوں بندے سول نافرمانی دی تحریک دی کال ݙتی، سی پیک منصوبے دے تحت توانائی دے منصوبے لڳݨے ہن، روزگار پیدا تھیوݨا ہئی، اتےاے بندہ اے منصوبے دے خلاف کھڑا ہئی۔ انہاں آکھیے اڄ اے بندہ آئی ایم ایف دے پروگرام تے چیخاں مریندا پئے جݙاں جو اے پروگرام اساں نی گھن آئے، ایں تے اساں دستخط نہ کیتے ہن ۔ انہاں آکھیے نواز شریف ملکی معیشت کوں استحکام بخشیا، آئی ایم ایف کوں خیر باد آکھیے، 2017ءاچ ملک ترقی دے رستے تے گامزن تھی چکیا ہئی ۔ انہاں آکھیے ملکی تاریخ دا واحد آئی ایم ایف پروگرام ہئی جیڑھا نواز شریف دے دور اچ مکمل تھیا ۔ نواز شریف ملک دے نوجواناں کوں خودمختار بݨاوݨ چاہندے ہن او ملک دے اندر آئی ٹی، زراعت، برآمدات کوں ودھارا ݙیوݨ چاہندے ہن انہاں دا وژن ملکی معیشت کوں مستحکم بݨاوݨ ہئی تے اے کم انہاں کرتے ݙکھائے صرف نعرے نی لاتے ۔ انہاں آکھیے ملک اے اندر 2013ء توں 2017ءتئیں 14 ہزار میگاواٹ بجلی پیدا کیتی، دہشت گردی دا خاتمہ کیتا، پاکستان دی تاریخ دے ساریں توں وݙے دہشت گردی دے خاتمے دے آپریشنز شروع کیتے جݙاں جو ݙوجھے پاسے ترقی دے منصوبیں کوں روکݨ کیتے ھک بندہ شخص کنٹینر تے کھڑا ہئی۔ مریم اورنگزیب آکھیے ملک دی وݙی خدمت کرݨ آلے دے نال وݙی زیادتی کیتی ڳئی ، پاناما دا فیصلہ اقامہ اچ تبدیل تھیا۔ انہاں آکھیے نواز شریف دے خلاف ایں کیتے سازش کیتی ویندی پئی ہئی جو او عوام کوں روزگار اتے کاروبار ݙیندا پیا ہئی ، ملک توں اندھاریں دا خاتمہ کریندا پئی ۔صحافیاں دے سوالاں دا جواب ݙیندے ہوئیں وفاقی وزیر اطلاعات آکھیے عمران خان جݙاں گرفتار تھئے تاں شہدا دی یادگاراں ساڑیاں ڳیاں لیکن انہاں کوں گڈ ٹو سی یو آکھیا ڳئے۔ فارن میڈیا کوں اپݨے انٹرویو اچ عمران خان اپݨی کافی عزت کروا چکن، ہر ویلھے کوڑ دے ذریعے کہیں کوں بے وقوف نی بݨایا ونج سگے۔ انہاں آکھیے جو چوری دی کہانیاں ساݙے کنے آچکیاں ہن اساں قانون دے حوالے کیتیاں۔ انہاں آکھیے تحقیقات دا جواب ٻالٹی، ڈبے اتے ڈسٹ بین توں نی ݙتا ونڄ سڳدا ھک ٻئے سوال تے انہاں 2013ءاچ ملک اتے ملک دے منتخب وزیراعظم دے خلاف سازش تھئی ، دراصل اے سازش پاکستان دے 22 کروڑ عوام دے نال ظلم ہئی ، ایجھے کرداراں کوں پاکستان دے عوام کݙاہیں معاف نہ کریسوں
