ایڈیشنل چیف سیکرٹری لوکل گورنمنٹ سندھ منظور علی شیخ نے کہا ہے کہ اینٹی ریبیز کنٹرول پروگرام کے ثمرات صوبے کی تمام عوام تک پہنچنا چاہئیں۔ ان خیالات کا اظہار منظور علی شیخ نے اپنے دفتر میں منعقد ہونے والی میٹنگ میں کیا جس میں پراجیکٹ ڈائریکٹر اینٹی ربیز کنٹرول پروگرام سمیرا حسین نے ایڈیشنل چیف سیکرٹری بلدیات سندھ کو پروگرام کے حوالے سے تفصیلی بریفنگ دی۔
اس موقع پر گفتگو کرتے ہوئے ایڈیشنل چیف سیکرٹری منظور علی شیخ کا کہنا تھا کہ اینٹی ریبیز کنٹرول پروگرام کو کراچی کے ساتوں اضلاع سے وسعت دیکر صوبے کی تمام یونین کونسلز تک پھیلایا جائے، تمام اضلاع میں اینٹی ربیز ہیلپ لائن نمبرز کا اجرا کیا جائے، کتوں کی نس بندی کے حوالے سے مزید میڈیکل سینٹرز کا قیام عمل میں لایا جائے، ویٹرنٹی عملے اور فیلڈ اسٹاف کی کمی کو پورا کیا جائے، اینٹی ربیز کنٹرول پروگرام کی افادیت اور اہمیت اجاگر کرنے کے لئے تمام ٹاوئز کی سطح پر آگاہی سیشنز کا اہتمام کیا جائے اور ہر یونین کونسل کی حدود میں موجود کتوں کی تعداد کا جائزہ لینے کے لئے حکمت عملی وضع کی جائے۔
منظور علی شیخ نے اس بات پر زور دیا کہ آوارہ کتوں کے کاٹنے سے بچاو کے لئے روایتی طریقوں پر انحصار کے بجائے جدید ٹیکنالوجی سے استفادہ حاصل کیا جائے اور لوگوں میں خوف و ہراس کا احساس ختم کرنے کے لئے نس بندی شدہ اور بے ضرر کتوں کو مخصوص رنگ کے کالر ٹیگ سے آراستہ کیا جائے۔
