حساس اداروں کی جانب سے سابق کمشنر راولپنڈی لیاقت علی چٹھہ سے متعلق ابتدائی رپورٹ تیار کرلی گئی ہے۔رپورٹ کے مطابق سابق کمشنر راولپنڈی سال 2013 سے 2018 کے درمیان اہم سرکاری عہدوں پر تعینات رہے، لیاقت علی چٹھہ ڈپٹی کمشنر فیصل آباد بھی تعینات رہے۔
رپورٹ کے مطابق لیاقت علی چٹھہ کے سابق وزیر اعلی پنجاب حمزہ شہباز کے ساتھ گہرے مراسم ہیں، ان کے بہنوئی بشارت چٹھہ مسلم لیگ ن سے وابستہ ہیں، ایک بہنوئی شعیب حیات سابق ایم پی اے مامون جعفر تارڑ کے قریبی دوست بھی ہیں، جبکہ تیسرے بہنوئی نصراللہ خان لاہور پولیس میں بطور انسپکٹر تعینات ہیں۔
رپورٹ میں کہا گیا کہ لیاقت علی چٹھہ کی رہائش نجی ہاسنگ سوسائٹی میں ہے اور ان کا حلقہ احباب بھی محدود ہے، لیاقت علی چٹھہ کے سابقہ ایم این اے سائرہ افضل تارڑ کے خاندان سے بھی گہرے مراسم ہیں۔ رپورٹ میں کہا گیا کہ لیاقت علی چٹھہ کا دوران سروس کرپشن یا مالی بے ضابطگیوں کا کوئی ریکارڈ نہیں، سابق کمشنر راولپنڈی ذہنی اور جسمانی طور پر مضبوط انسان ہیں۔
