تحریر: ریحان خان
اسلام آباد، پیر، 13 جنوری 2025 (ٹی این ایس): پاکستان میں جاپان کے سفیر اکاماتسو شوئیچی نے پیر کے روز پنجاب کے ضلع منڈی بہاؤالدین میں دیہی کمیونٹیز کے لیے بجلی کی سہولیات فراہم کرنے کے دو منصوبوں کا افتتاح کیا۔
یہ منصوبے ہناء ڈیولپمنٹ کونسل کے زیرانتظام ہیں، جو ایک غیرسرکاری تنظیم ہے جو صحت اور بنیادی ڈھانچے کی بہتری کے لیے کام کرتی ہے۔ ان منصوبوں کا مقصد خاص طور پر منڈی بہاؤالدین کے دیہی علاقوں میں معیارِ زندگی کو بہتر بنانا ہے۔
حکومتِ جاپان نے گرینٹ اسسٹنس فار گراس روٹس ہیومن سیکیورٹی پروجیکٹس (GGP) پروگرام کے تحت 92,307 امریکی ڈالر کی مالی امداد فراہم کی ہے۔ اس میں 2019 میں 42,818 امریکی ڈالر کی رقم آٹھ کمیونٹیز کو پائیدار بجلی کی سہولت فراہم کرنے کے لیے مختص کی گئی تھی، جب کہ 2022 میں 49,489 امریکی ڈالر مزید سات کمیونٹیز کو بجلی کی سہولت سے منسلک کرنے کے لیے دیے گئے۔ افتتاحی تقریب میں جاپانی سفارت خانے کے اہلکار، این جی او کے بورڈ ممبران اور کمیونٹی کے رہنما بھی شریک تھے۔
ہناء ڈیولپمنٹ کونسل اب تک جاپانی امدادی پروگرام کے تحت تین مرتبہ گرانٹ حاصل کر چکی ہے اور یہ تنظیم گزشتہ 20 سالوں سے پاکستان کے کمزور علاقوں کے لوگوں کو بااختیار بنانے کے لیے جاپانی سفارت خانے کے ساتھ مل کر کام کر رہی ہے۔
حکومتِ جاپان کی جانب سے فراہم کردہ 92,307 امریکی ڈالر کی یہ گرانٹ علاقے کے عوام کے رہنے کے معیار کو بہتر بنانے، نئے مواقع پیدا کرنے، اور جدید توانائی کی سہولیات تک رسائی کو یقینی بنا کر معاشی ترقی کو فروغ دینے کے لیے استعمال کی گئی ہے۔
افتتاحی تقریب سے خطاب کرتے ہوئے اکاماتسو شوئیچی نے پنجاب اسمبلی کی رکن اور تنظیم کی صدر حمیدہ وحیدالدین کو ان اہم منصوبوں کی کامیاب تکمیل پر مبارکباد دی۔
اکاماتسو نے ان منصوبوں کے اثرات پر روشنی ڈالی اور کہا کہ ان کے نتیجے میں اب 15 کمیونٹیز کو پائیدار بجلی کی سہولت حاصل ہو چکی ہے۔ یہ منصوبے ہزاروں افراد کی روزمرہ زندگیوں میں حقیقی تبدیلی لے کر آئے ہیں۔ یہ صرف بجلی کے نظام کی تنصیب تک محدود نہیں بلکہ کمیونٹیز کو بااختیار بنانے اور زندگی کو بہتر بنانے کا عزم ہے۔
انہوں نے مزید کہا کہ جاپان کی حکومت پاکستان کے عوام کی زندگی کے معیار کو بہتر بنانے کے لیے تعاون جاری رکھے گی اور اس خواہش کا اظہار کیا کہ یہ منصوبہ جاپان اور پاکستان کے عوام کے درمیان موجودہ تعلقات کو مزید مضبوط کرے گا۔
