اسلام آباد:اگست30(ٹی این ایس)بے نظیر بھٹو قتل کیس میں 10سال سماعت6ججز کی تبدیلی اور 67گواہوں کے بیانات کے بعد فیصلہ کل جمعرات کو سنائے جانے کا ا امکان ہے۔ تفصیلات کے مطابق دہشتگردی کی خصوصی عدالت میں بے نظیر بھٹو قتل کیس کی سماعت آخری مراحل میں پہنچ چکی ہے اور امکان ظاہر کیا جا رہاہے کہ کیس کا فیصلہ جمعرات کو سنایا جائے گا اس کیس میں 7ملزمان کے خلاف کیس کی سماعت10سال قبل شروع ہوئی تھی۔ جن میں سے ایک ملزم سابق صدر پرویز مشرف کی حد تک کیس الگ کر دیا گیا ہے جو اشتہاری ملزم ہیں ۔ 5ملزمان جن میں رفاقت حسنین، شیر زمان، اعتزاز اور رشید احمد اڈیالہ جیل میں قید ہیں جبکہ 2ملزمان سابق سی پی مسعود عزیز اور ایس پی راول ٹاؤن خرم شہزاد بھی ہیں۔ کیس میں 67گواہوں کے بیانات قلمبند ہو چکے ہیں اور وکلاء کے دلائل آج بدھ کو مکمل ہو جائیں گے جبکہ کل جمعرات کو مقدمہ کا فیصلہ سنائے جانے کا امکان ظاہر کیا جا رہا ہے واضح رہے کہ بے نظیر بھٹو کو27دسمبر 2007ء کو لیاقت باغ میں جلسہ کے بعد قتل کیا گیا تھا اور 10سال کیس کی سماعت کے دوران6ججز تبدیل ہوئے ہیں اور اب 10سال کے بعد کیس منطقی انجام تک پہنچ رہا ہے۔
