تحریر: ریحان خان
ریاض، اتوار، 16 فروری 2025 (ٹی این ایس): کنگ سلمان ہیومینیٹیرین ایڈ اینڈ ریلیف سینٹر (کے ایس ریلیف) نے اسلامی سال 1446 ہجری کے لیے “اطعام-4” منصوبے کا آغاز کر دیا ہے، جس کے تحت رمضان المبارک کے دوران 27 ممالک میں 3,90,109 غذائی باسکٹس تقسیم کی جائیں گی۔ اس منصوبے سے 23 لاکھ سے زائد افراد مستفید ہوں گے، جبکہ اس پر 6.7 کروڑ سعودی ریال سے زائد لاگت آئے گی۔
افتتاحی تقریب سے خطاب کرتے ہوئے کے ایس ریلیف کے نگرانِ اعلیٰ ڈاکٹر عبداللہ الربیعہ نے کہا کہ یہ اقدام عالمی سطح پر سعودی عرب کی انسانی ہمدردی کی کوششوں کا عکاس ہے۔ انہوں نے خوراک کی دستیابی اور ضرورت مند طبقات کے معیارِ زندگی کو بہتر بنانے میں اس منصوبے کی اہمیت پر زور دیا۔
2015 میں قیام کے بعد سے کے ایس ریلیف اب تک 105 ممالک میں 3,309 امدادی منصوبے مکمل کر چکا ہے، جن پر 7 ارب امریکی ڈالر سے زائد کی لاگت آئی ہے۔ یہ تنظیم دنیا بھر میں ضرورت مندوں کی امداد کے لیے سعودی عرب کے عزم کا عملی اظہار ہے
