اسلام آباد (ٹی این ایس): انسپکٹر جنرل آف پولیس اسلام آباد محمد خالد خٹک نے پولیس لائنز ہیڈ کوارٹرز اسلام آبادمیں اسلام آباد پولیس انٹر ڈیژن لیول پر مختلف کھیلوں کے مقابلوں کا باقاعدہ افتتاح کر دیا۔اس موقع پر ڈی آئی جی آپریشنز اسلام آباد میر ویس نیاز ،ایس ایس پی ہیڈ کوارٹرز محمد بن اشرف ،ایس پی ہیڈ کوارٹرز سمیرا اعظم،ایس پی اے آر یو ملک طاہر محمود کے علاوہ دیگر پولیس اہلکاروں کی بڑی تعداد موجود تھی۔ایس پی سٹی شیخ زبیر احمد کی سربراہی میں سب انسپکٹر محمد ایوب اعوان سپورٹس آفیسراور اے ایس آئی محمد طاہر اسسٹنٹ سپورٹس آفیسر پر مشتمل سپورٹس کمیٹی نے تمام ڈویژنز سے کھلاڑیوں کا چناؤ کیا ہے جبکہ ایس ایس پی ہیڈ کوارٹرز محمد بن اشرف ان تمام کھیلوں کی سرگرمیوں کی نگرانی کررہے ہیں ۔آئی جی اسلام آباد نے پہلے انٹر ڈویژن والی بال میچ کا افتتاح بال کو سمائش لگا کر کیااس موقع پر وہ دونوں ٹیموں کے کھلاڑیوں ملے اور ان کے لئے نیک تمناؤں کا اظہار کیا۔آج پہلے میچ میں اسلام آباد پولیس لاجسٹک ڈویژن اور سکیورٹی ڈویژنز کی ٹیموں کے درمیان میچز کھیلے جائیں گے ۔آئی جی اسلام آباد نے دیگر سینئر افسران کے ساتھ میچ بھی دیکھا ۔کھلاڑیوں سے بات چیت کرتے ہوئے انہوں نے کہا کہ کھیلوں کی سرگرمیاں انسانی زندگی کی ترقی اور قیام میں اہم کردار ادا کرتی ہیں اور صحت مند معاشرے کی تعمیر میں مدد کرتی ہیں ۔کھیلوں سے ناصرف لوگوں میں مقابلے کا رجحان پیدا ہوتا ہے بلکہ دباؤ کے ماحول سے نکلنے میں بھی معاون ثابت ہوتے ہیں ۔چونکہ پولیس افسران و جوان لوگوں کی جان و مال کے تحفظ ،جرائم پیشہ عناصر کی سرکوبی اور امن و عامہ کے قیام کے لئے مقررہ اوقات سے بھی زیادہ وقت کے لئے اپنے فرائض منصبی سرانجام دینے میں مصروف رہتے ہیں جس وجہ سے وہ ذہنی دباؤ کا شکار ہو جاتے ہیں ۔پولیس اہلکاروں کی توجہ ایک جیسی روزمرہ روٹین سے ہٹا کراورذہنی طور پر تھکا دینے والے امور سے وقتی طور پر ان کی ذہنی و جسمانی فٹنس کو برقرار رکھنے کے لئے کھیلوں کا انعقاد کرایا جارہا ہے ۔اس سے اہلکار ایک نئے جذبے او رولولے کے ساتھ فرائض منصبی سرانجام دے سکیں گے۔آئی جی اسلام آباد نے مزید کہا کہ مرد کھلاڑیوں کے ساتھ ساتھ خواتین پولیس اہلکار بھی ان کھیلوں کی سرگرمیوں میں بھرپورحصہ لیں گی۔آئی جی اسلام آباد نے ہدایات جاری کرتے ہوئے کہا کہ کھیلوں کا انعقاد ہر سال کروایا جائے تاکہ ایسی صحت مند سرگرمیوں کو جاری رکھا جاسکے ۔
