لندن، 18 ستمبر 2025 (ٹی این ایس)– گلوبل اینڈ کامن ویلتھ ایس ایم ای کلب لندن، برطانیہ بینک آف پنجاب کو “بی او پی ایس ایم ای ڈیجیٹل فنانس” کے کامیاب آغاز پر اپنی پرخلوص مبارکباد پیش کرتا ہے۔ یہ ایک انقلابی اقدام ہے جو پاکستان کے مالیاتی شعبے میں ایک اہم سنگِ میل ثابت ہوگا اور چھوٹے و درمیانے درجے کے کاروباری اداروں (SMEs) کو درکار فنانس تک آسان رسائی فراہم کرے گا۔
بینک آف پنجاب کے صدر و سی ای او جناب ظفر مسعود کی وژنری قیادت میں، بینک نے ہمیشہ ایس ایم ای سیکٹر کی ترقی کے لیے جدید مالیاتی حل فراہم کرنے کا عملی مظاہرہ کیا ہے۔ ان کی قیادت بی او پی ایس ایم ای ڈیجیٹل فنانس کے اجراء میں فیصلہ کن کردار ادا کرتی ہے جو کاروباری حضرات اور چھوٹے کاروباروں کو بااختیار بنانے کی ان کی غیر معمولی کاوش کا ثبوت ہے۔
پاکستان میں گلوبل اینڈ کامن ویلتھ ایس ایم ای کلب لندن کے صدر (کوآرڈینیشن) مرزا عامر خورشید نے کہا کہ”بینک آف پنجاب ایس ایم ای ڈیجیٹل فنانس پاکستان میں ایس ایم ایز کے لیے ایک گیم چینجر ثابت ہوگا، جو کاروباری حضرات کو اپنے بزنس بڑھانے اور معاشی ترقی میں اہم کردار ادا کرنے کے لیے بااختیار بنائے گا۔ ہم بینک آف پنجاب کی شمولیتی اور ڈیجیٹل فنانشل سلوشنز کو فروغ دینے کی کاوشوں کو سراہتے ہیں اور ان کے ساتھ مل کر کاروباری افراد اور چھوٹے کاروباروں کو مزید طاقتور بنانے کے منتظر ہیں۔”
گلوبل اینڈ کامن ویلتھ ایس ایم ای کلب کے صدر (ایس ایم ای ڈیولپمنٹ) ڈاکٹر توقیر اختر نے بھی مبارکباد دیتے ہوئے کہا کہ “یہ اقدام پاکستان میں ایس ایم ایز کے لیے فنانسنگ گیپ کو کم کرنے کی ایک بڑی پیشرفت ہے۔ ہم چھوٹے کاروباروں کی ترقی میں بینک آف پنجاب کی کوششوں کو سراہتے ہیں اور ان کے ساتھ مل کر کاروباری سرگرمیوں اور معاشی ترقی کو فروغ دینے کے خواہاں ہیں۔”
گلوبل اینڈ کامن ویلتھ ایس ایم ای کلب لندن، برطانیہ پاکستان اور دنیا بھر میں ایس ایم ایز کی معاونت کی اہمیت کو تسلیم کرتا ہے۔ ہمارا یقین ہے کہ بینک آف پنجاب جیسے اداروں کے ساتھ شراکت داری معاشی ترقی، روزگار کے مواقع پیدا کرنے اور مالی شمولیت کو فروغ دینے میں کلیدی کردار ادا کرے گی۔
