لاہور،2 اکتوبر (ٹی این ایس): لاہور اورنج لائن میٹرو ٹرین کے لئے بوگیوں کی پہلی کھیپ گزشتہ روز کراچی سے لاہور پہنچ گئی ۔ پانچ ہیوی ٹرالوں پر دو انجن اور تین بوگیاں لاہور لائی گئی ہیں جو 25ستمبرکو کراچی سے روانہ کی گئیںاور سات دن میں اپنا سفر طے کر کے گزشتہ روز لاہور پہنچیں، ایک انجن کی لمبائی 60فٹ جبکہ وزن 33ٹن ہے۔ ان بوگیوں کو ڈیرہ گجراں میں تعمیر کئے جانے والے ڈپو میں کھڑا کر دیا گیا ہے جہاں ان کی تقریب رونمائی7اکتوبرکو منعقد ہوگی، اورنج لائن میٹرو ٹرین کے لئے چین سے ٹرینوں کے 27سیٹ درآمد کئے جا رہے ہیں ‘ہر سیٹ پانچ بوگیوں پر مشتمل ہو گا ،یہ ٹرین 80کلومیٹر فی گھنٹہ کی رفتار سے چلے گی اور ڈیرہ گجراں سے علی ٹائون تک 27کلومیٹر فاصلہ صرف45منٹ میں طے کریں گی ، میٹرو ٹرین کے آغاز پر روزانہ اڑھائی لاکھ افراد اس کے ذریعے سفر کریں گے اور اگلے پانچ سال کے دوران یہ تعداد پانچ لاکھ مسافر یومیہ ہو جائے گی،منصوبے کے چینی کنٹریکٹر سی آر نورنکو کے جاری کردہ شیڈول کے مطابق23ٹرینیں اس سال کے آخر تک لاہور پہنچ جائیں گی، لاہور اورنج لائن میٹرو ٹرین منصوبے کا تین چوتھائی تعمیراتی کام مکمل کر لیا گیا ہے ۔
