ریاض ،اکتو بر09(ٹی این ایس):ریاض پولیس نے 50 لاکھ ریال مالیت کا سونا لوٹنے والے 6 پاکستانیوں کو گرفتار کرلیا۔ ریاض پولیس کے ترجمان نے میڈیا سے بات کرتے ہوئے کہا کہ واردات کرنےو الوں نے سونے کا شو روم بند کرکے گھر جانے والے یمنی کارکن کو قابو کرلیا تھا۔ وہ اس کے ہاتھ پاﺅں باندھ کر اسے شوروم واپس لائے۔ چابی چھینی اور پھر شوروم کھول کر وہاں موجود 50 لاکھ ریال مالیت کے زیورات قبضے میں کرکے فرار ہوگئے تھے۔
ریاض پولیس نے واردات کی اطلاع ملنے پر صورتحال کی سنگینی کے پیش نظر رہزنوں کو گرفتار کرنے کے سخت احکام جاری کئے۔ ریاض پولیس کے ڈائریکٹر نے انتہائی ہنرمند اور تجربہ کار افسران پر مشتمل ایک ٹیم رہزنوں کی نشاندہی ،تلاش اور گرفتاری کیلئے تشکیل دی۔ بالآخر ٹیم نے انہیں تلاش کرکے گرفتار کرلیا۔ ان میں سے دو ریاض سے سے باہر جانے کے لیے فلائٹ پر سوار ہونے ہی والے تھے۔ واردات میں استعمال ہونےو الی کار بھی برآمد کرلی گئی۔
تفصیلات سے پتہ چلاہے کہ واردات میں استعمال ہونے والی کارجعلی کاغذات کی بنیاد پر ایجنسی سے کرائے پر حاصل کی گئی تھی۔ واردات کرنے والوں نے اعتراف جرم کر لیا ہے اور پولیس نے انکا بیان بھی ریکارڈ کر لیا ہے۔ پاکستانی گروہ نے ایک کمپنی کی گاڑی بھی چوری کی تھی جس میں لاکھوں ریال مالیت کے 1225 لیپ ٹاپ رکھے ہوئے تھے جنہیں وہ بیرون مملکت بھجوانے کے انتظامات کر چکے تھے ۔ پولیس کے ترجمان نے میڈیا سے بات کرتے ہوئے بتایا کہ کیس میں پیش رفت شروع ہو چکی ہے اور معاملہ پراسیکیوشن کے حوالے کر دیا ہے۔
