اوٹاوا،اکتوبر 26 (ٹی این ایس): پاک فوج کی کاروائی کے نتیجہ میں طالبان چنگل سےرہائی پانے والی خاتون کیٹلین کولمین نے کہا ہے کہ اغواء کاروں نے پانچ پرس کے عرصہ میں انھیں افغانستان اور پاکستان ،دونوں ملکوں میں رکھا۔ واضع رہے کہ مذکورہ امریکی خاتون کو اسکے کنیڈین شوہر کے ساتھ 2012 میں افغانستان سے اغواء کیا گیا تھا اور پانچ پرس کی قید کے دوران انکے ہاں تین بچے بھی ہوئے۔
پاک فوج نے کئی سالوں سے طالبان کی قید میں موجود انھیں گزشتہ دنوں بازیاب کروایاتھا۔
ٹورنٹو سٹار سے گفتگو کرتے ہوئے کیٹلین نے کہا ہے کہ ” ہر کوئی دعوے کر رہا ہے اور الزامات لگا رہا ہے۔ پاکستان کہتا ہے کہ طالبان نے ہمیں کبھی ان کے ملک میں نہیں رکھا۔ امریکہ کہتا ہے کہ طالبان نے شروع سے ہی ہمیں پاکستان میں رکھا ہوا تھا۔ ان میں سے کوئی موقف بھی درست نہیں ہے۔ دراصل طالبان نے ہمیں ابتدائی سال افغانستان میں ہی رکھا اور بازیاب ہونے سے لگ بھگ ایک سال پہلے ہمیں پاکستان منتقل کیا گیا تھا۔ ہمیں پاکستان اور افغانستان دونوں ملکوں میں قید رکھا گیا۔
کیٹلین کا کہنا تھا کہ طالبان نے ہمیں میران شاہ کے علاقے میں محمود نامی شخص کے گھر میں بھی قید رکھا۔ محمود ہمارے بیٹے نجیشی کے ساتھ بہت اچھا سلوک کرتا تھا۔ وہ اسے باہر بھی لیجاتا تھا۔ ہمارے بیٹے کے ساتھ ایسا بہتر سلوک اس سے پہلے کسی نے نہیں کیا تھا۔ وہ اسے مختلف اشیاءبھی خرید کر دیتا تھا۔“ رپورٹ کے مطابق کیٹلین اب بھی حجاب پہنتی ہے تاہم ٹورنٹوسٹار سے گفتگو میں اس نے اپنے اور اپنے شوہر کے قبول اسلام کے متعلق سوال کا جواب دینے سے انکار کر دیا۔
