پاکستان کرکٹ بورڈ نے چیف سلیکٹر انضمام الحق کو ٹی ٹین لیگ فرنچائز خریدنے سے روک دیا

 
0
447

لاہوراکتوبر 27(ٹی این ایس) پاکستان کرکٹ بورڈ نے قومی کرکٹ ٹیم کے چیف سلیکٹر انضمام الحق کو متحدہ عرب امارات میں ٹی ٹین لیگ فرنچائز خریدنے سے روک دیا البتہ وہ ٹیم کے مینٹور بن سکتے ہیں۔ اس حوالے سے چیف سلیکٹر انضمام الحق نے بتایا کہ میرا ٹی ٹین لیگ کی تمام چھ فرنچائز سے کوئی تعلق نہیں اور نہ ہی میں نے کوئی ٹیم خریدی ہے البتہ میرے بھائی انتظار الحق کے ایک ٹیم میں شیئر ہیں۔ انہوں نے کہا کہ کرکٹ بورڈ نے انہیں یہی کہا ہے کہ وہ ایسا کوئی کام نہیں کرسکتے جو بورڈ کی پالیسیوں سے متصادم ہو البتہ اگر وہ چاہیں تو کسی ٹیم کے ساتھ کام کرسکتے ہیں۔دوسری جانب چیئرمین پی سی بی نجم سیٹھی کا کہنا ہے کہ انضمام الحق پاکستان کرکٹ بورڈ میں کنسلٹنٹ ہیں، وہ ہمارے لئے اپنے باقی کاروبار روک نہیں سکتے، اگر کنسلٹنٹ بن کر انضمام چاہیں تو کہیں اور سرمایہ کاری کرسکتے ہیں۔

انہوں نے کہا کہ رواں سال دسمبر میں ہونے والے ٹی ٹین ٹورنامنٹ میں امارات کرکٹ بورڈ کی دلچسپی بہت ہے، ہم نے امارات کرکٹ بورڈ سے کہا کہ کوئی ایسا منصوبہ نہ لایا جائے جس میں ہمارا نقصان ہو۔ چیئرمین پی سی بی کے مطابق پاکستانی فرنچائز بھی اس لیگ کو کرانے کو تیار ہیں، کچھ نے ٹیمیں بھی خریدی ہیں۔ ذرائع کا کہنا ہے کہ پاکستان کرکٹ بورڈ اپنے کئی کھلاڑیوں کو اس نئی لیگ کے لئے ریلیز کردے گا۔ آئی سی سی کا کہنا ہے کہ ٹی ٹین لیگ کو اس نے نہ منظور کیا ہے اور نہ ہی اس ٹورنامنٹ کو ڈس اپروو کرکٹ میں شامل کرسکتے ہیں۔ ذرائع کا کہنا ہے کہ ٹی ٹین لیگ خالصتا امارات بورڈ کا منصوبہ ہے چوں کہ پاکستان اپنی انٹرنیشنل ہوم کرکٹ متحدہ امارات میں کھیلتا ہے اس لئے پی سی بی اس لیگ کی مخالفت نہیں کرسکتا۔