اسلام آباد ،نو مبر06(ٹی این ایس): پاکستان میں متعین امریکی سفیر ڈیوڈہیل نے کہا ہے کہ امریکا نے بھارت پر افغانستان میں اقتصادی سطح پر ڈو مور کا مطالبہ کیا جبکہ بھارت پر پاکستان سے تعلقات میں بہتری لانے کے لیے دباﺅ ڈالا ہے۔اسلام آباد میں پاکستان اور امریکا کے درمیان ٹریک ٹو مذاکرات کے چوتھے دور میں اپنے خیالات کا اظہارکرتے ہوئے پاکستان میں امریکی سفیر ڈیوڈ ہیل نے کہا کہ پاکستانی قیادت نے افغانستان میں قیام امن کے لیے کوششیں تیز کرنے کا یقین دلایا ہے ہم چاہتے ہیں کہ پاکستان دہشتگردوں کے خلاف فیصلہ کن کارروائی کرے، امریکا نے بھارت پر افغانستان میں اقتصادی سطح پر ڈو مور کامطالبہ کیا جبکہ بھارت پر پاک بھارت تعلقات میں بہتری لانے کے لیے بھی دباو ڈالاہے۔
امریکی سفیر نے کہا کہ ہمیں طالبان پر اس وقت تک دباﺅجاری رکھنا ہے جب تک وہ مذاکرات کی میز پر نہیں آتے، خواتین کا احترام اور اقلیتوں کو تحفظ فراہم نہیں کرتے اس وقت تک دباﺅ جاری رکھا جائے گا اور تمام گروہوں کے ساتھ ایک ہی طریقے سے نمٹاجائےگا۔ڈیوڈ ہیل نے خطے میں امریکی پالیسی کی وضاحت کرتے ہوئے کہا کہ امریکہ کی نئی حکمت عملی علاقائی بنیادوں پر ہے جس کا مقصد دہشت گردوں کی محفوظ پناہ گاہوں کا خاتمہ اور اقتصادی خوشحالی میں اضافہ کرنا ہے۔
