ریاض،نو مبر 29(ٹی این ایس) : مقامی ذرائع ابلاغ کے مطابق سعودی عرب میں “غیر قانونی تارکین سے پاک وطن” قومی مہم کے تحت دو ہفتوں کے دوران اقامہ و لیبر قوانین اور سرحدی قوانین کی خلاف ورزی کرنے والے 99 ہزار 135غیر ملکیوں کو گرفتار کر لیا گیا ہے۔ وزارت داخلہ کی جانب سے جاری کردہ اعداد و شمارسے واضح ہے کہ یہ قومی مہم گزشتہ ہفتے بدھ کے روز شروع کی گئی تھی۔ 9ربیع الاول 1439ھ پیر کی شام تک مبینہ گرفتاریاں عمل لائیں گئیں۔
ریاست بھر میں اقامہ قوانین کی خلاف ورزی کرنیوالے 57546 افراد ،سرحدی قوانین کی خلاف ورزی کرنےوالے 17303افراد اور محنت قوانین کی خلاف ورزی کرنیوالے 24286 افراد گرفتار کیے گئے ہیں۔ علاوہ ازیں 1325درانداز بھی گرفتار کئے گئے ہیں ۔ ان میں سے 79فیصد یمنی ، 20فیصد ایتھوپین اور ایک فیصد دیگر ممالک کے افراد ہیں۔ 564دراندازوں کو بیدخل کر دیا گیا ہے۔
29افراد کو سعودی عرب سے غیر قانونی طریقے سے سرحد پار کرتے ہوئے گرفتار کیا گیا ہے۔ اقامہ و لیبر قوانین اور سرحدی قوانین کی خلاف ورزی کرنے والوں کوسفر، رہائش اور پناہ دینے میں ملوث 376 افراد کو بھی گرفتار کیاگیا ہے۔ مذکورہ سرگرمیوں کے شبہ میں 48 سعودیوں کو گرفتار کیا گیا ہے۔29کو فوری سزائیں دے کر چھوڑ دیا گیا ہے۔ دیگر 19سعودی شہریوں کے خلاف قانونی کارروائی کی جا رہی ہے۔
12075غیر قانونی تارکین وطن کیخلاف بیدخلی کی کارروائی ہو رہی ہے۔ ان میں 10970مرد اور 1100خواتین ہیں۔ 14997تارکین کو بیدخل کر دیا گیا ہے۔ 9590 افراد کو فوری سزائیں دیدی گئیں ہیں ۔ 12395 افراد کو سفری دستاویزات حاصل کرنے کیلئے سفارتی مشنوں کے حوالے کر دیا گیا ہے۔ 12808 افراد کو سفر کی کارروائی مکمل کرنے کی ہدایت کر دی گئیں ہیں۔
