استنبول دسمبر 13(ٹی این ایس)امریکا کی جانب سے یروشلم کو اسرائیلی دارالحکومت تسلیم کرنے کے اعلان پر اسلامی دنیا کے مشترکہ موقف کے اعلان کے لیے او آئی سی کا سربراہی اجلاس آج ترکی کے شہر استنبول میں منعقد ہو گا ۔اجلاس میں شرکت کے لیے وزیراعظم شاہد خاقان عباسی ترکی پہنچ گئے ہیں،استنبول پہنچنے پر ترک حکومت کے سینئر حکام، ترکی میں پاکستان کے سفیر سجاد قاضی اور سفارتخانہ کے دیگر حکام نے وزیراعظم اور ان کے وفد کا استقبال کیا۔او آئی سی کا غیر معمولی سربراہ اجلاس ترکی کے صدر رجب طیب اردگان کی جانب سے بلایا گیا ہے۔ او آئی سی کے اجلاس میں تقریباً 26 اسلامی ممالک کے سربراہان شرکت کریں گے اور صورتحال سے نمٹنے کیلئے غور کریں گے۔سربراہ اجلاس سے قبل وزرائخارجہ کونسل کا اجلاس بھی ہو گا جس میں وزیر خارجہ محمد آصف شرکت کریں گے۔ وزیراعظم فلسطین کے عوام کے لئے پاکستان کے عوام اور حکومت کی غیرمتزلزل حمایت کے جذبات پہنچائیں گے۔وہ اسلامی تعاون تنظیم پر زور دیں گے کہ بیت المقدس کے معاملے پر مشترکہ موقف اپنایا جائے اور امریکی انتظامیہ سے اپنے فیصلے پر نظرثانی کا مطالبہ کیا جائے گا۔پاکستانی حکومت اور عوام کو امریکہ کی جانب سے سفارتخانہ کو القدس (یروشلم) منتقل کرنے کے فیصلے پر تشویش ہے۔ اس طرح کا اقدام بین الاقوامی قوانین اور اقوام متحدہ کی سلامتی کونسل کی قراردادوں خاص طور پر یو این ایس سی آر 478 کی خلاف ورزی ہے۔پاکستان کی حکومت اور عوام غیرقانونی طور پر امریکی سفارتخانہ یروشلم منتقل کرنے کے خلاف ہے۔ پاکستان نے امریکہ پر زور دیا ہے کہ وہ یروشلم کے کردار کو تبدیل کرنے کے اقدام سے قبل اقوام متحدہ کی سلامتی کونسل کے قراردادوں بشمول یو این ایس سی آر 478 پر عمل کرے۔ سربراہ اجلاس میں امریکہ کی جانب سے اپنے سفارتخانے کو تل ابیب سے مقبوضہ بیت المقدس منتقل کرنے کے فیصلے کا جائزہ لیا جائے گا۔علاوہ ازیں ذرائع کے مطابق وزیراعظم شاہد خاقان عباس، وزیراعلیٰ پنجاب شہبازشریف اور وزیر خارجہ خواجہ آصف کے ہمراہ دورہ ترکی کے بعد لندن جائیں گے، تینوں راہنما لندن میں سابق وزیراعظم نوازشریف سے ملاقات کریں گے۔
