اسلام آبادجنوری 17(ٹی این ایس)سابق وزیر خزانہ اسحاق ڈار نے اسلام آباد ہائیکورٹ میں متفرق درخواست دائر کردی جس میں ان کی میڈیکل رپورٹ بھی لگائی گئی ہے۔سابق وزیر خزانہ اسحاق ڈار کے خلاف آمدن سے زائد اثاثوں کا ریفرنس اسلام آباد کی احتساب عدالت میں زیر سماعت ہے جس میں مسلسل غیر حاضری پر عدالت انہیں اشتہاری ملزم قرار دے چکی ہے جبکہ اسحاق ڈار طویل عرصے سے عدالت سے غیر حاضر ہیں۔اسلام آباد ہائیکورٹ میں سابق وزیر خزانہ اسحاق ڈار کے وکلا کی جانب سے ایک اور متفرق درخواست دائر کی گئی ہے جس میں اسحاق ڈار کی نئی میڈیکل رپورٹ کی کاپی بھی لگائی گئی ہے۔میڈیکل رپورٹ کے مطابق اسحاق ڈار کو گردن میں تکلیف ہے اور وہ اس تکلیف کے باعث دائیں بازو میں بھی درد محسوس کررہے ہیں۔رپورٹ میں بتایا گیا کہ اسحاق ڈار 11 جنوری کو طبی معائنے کیلئے لندن اسپائنل سینٹر آئے ٗانہیں درد کی کمی کیلئے دوائیں تجویز کی گئی ہیں۔رپورٹ میں تجویز کیا گیا کہ اسحاق ڈار طویل سفر اور جسمانی مشقت کے کاموں سے گریز کریں جبکہ 6 ہفتوں بعد دوبارہ معائنہ کرائیں۔
