اسلام آباد مارچ 1(ٹی این ایس): زینب قتل کیس میں ڈاکٹر شاہد مسعود کے انکشافات پر بنائی گئی جے آئی ٹی نے ڈاکٹر شاہد مسعود کے الزامات کو بے بنیاد قرار دے دیا ہے۔ میڈیا رپورٹ کے مطابق تحقیقاتی کمیٹی نے ڈاکٹر شاہد مسعود کے انکشافات اور ان پر کی گئی تحقیقات پر مشتمل رپورٹ آج سپریم کورٹ میں جمع کروائی۔ رپورٹ میں ڈاکٹر شاہد مسعود کے 18 الزامات کو مسترد کر کے انہیں بے بنیاد قرار دیا گیا ہے۔رپورٹ میں کہا گیا کہ ملزم عمران علی کا عالمی مافیا سے تعلق ثابت نہیں ہوا۔ ملزم عمران علی کی کوئی سیاسی وابستگی نہیں۔ملزم عمران علی کے 37بنک اکا?نٹس ہونے کا دعویٰ بھی جھوٹا ثابت ہوا۔ رپورٹ میں تحقیقاتی کمیٹی کا کہنا تھا کہ ملزم عمران علی کے وی سی پی گروہ کے متحرک رکن ہونے کا بھی کوئی ثبوت نہیں ملا۔ ملزم عمران علی غریب ہے اور اس کے بنک اکاؤنٹ میں کروڑوں روپے ہونے سے متعلق بھی کوئی ثبوت نہیں ہے مزید برآں ملزم عمران علی کو پولیس حراست میں مارنے کا دعویٰ بھی جھوٹا ثابت ہوا۔یاد رہے کہ سپریم کورٹ نے زینب قتل کیس میں ڈاکٹر شاہد مسعود کے انکشافات کی تحقیقات کے لیے ایک کمیٹی تشکیل دی تھی جو ڈاکٹر شاہد مسعود کیملزم عمران علی سے متعلق انکشافات اور دعووں کی تحقیقات کر رہی تھی۔
